İctimai iaşə müəssisələrində qida təhlükəsizliyi məsələləri son dövrlərdə daha çox müzakirə olunur. Artan zəhərlənmə halları bu sahədə nəzarətin və maarifləndirmənin vacibliyini bir daha ön plana çıxarır.
Qida məsələləri üzrə baş mütəxəssis, Azərbaycan Mütəxəssislər Assosiasiyasının idarə heyətinin üzvü Ağa Salamov Qht.az-a açıqlamasında bildirib ki, aparılan yoxlamaların əsas məqsədi cərimələməkdən çox sahibkarları maarifləndirmək olmalıdır. Onun sözlərinə görə, nöqsanların aradan qaldırılması üçün vaxt verilməsi də bu yanaşmanın tərkib hissəsidir.
Ekspert qeyd edib ki, Qida Təhlükəsizliyi Agentliyinin fəaliyyəti təqdirəlayiqdir və bu istiqamətdə görülən işlər insan sağlamlığının qorunmasına xidmət edir. O vurğulayıb ki, filtrdən keçməyən, mənşəyi məlum olmayan suyun istifadəsi qida məhsullarının keyfiyyətinə ciddi təsir göstərir: “Belə suyun tərkibində ağır metallar və digər zərərli maddələr qala bilər. Bu isə həmin sudan hazırlanan bütün məhsullara, o cümlədən çörəyə də mənfi təsir edir”.
Onun sözlərinə görə, ictimai iaşə müəssisələrində filtrasiya sistemlərinin tətbiqi mütləqdir və bu tələb obyektin səviyyəsindən asılı olmayaraq hamıya şamil edilməlidir.
Mütəxəssis gigiyenik qaydaların pozulmasının ciddi nəticələrə səbəb olduğunu da diqqətə çatdırıb. Bildirib ki, səthlərin təmiz saxlanmaması və eyni alətlərin müxtəlif məhsullar üçün yuyulmadan istifadə olunması çarpaz çirklənməyə gətirib çıxarır: “Məsələn, toyuq doğranan bıçaq yuyulmadan başqa məhsullar üçün istifadə edilərsə, salmonella kimi bakteriyalar yayıla bilər. Bu isə kütləvi qida zəhərlənmələrinə, hətta ölüm hallarına səbəb ola bilər”.
Ekspert son dövrlərdə qida zəhərlənmələrinin artmasını ictimai iaşə obyektlərinin çoxalması ilə əlaqələndirib. O qeyd edib ki, bəzi sahibkarlar qida təhlükəsizliyi biliklərinə malik olmadan fəaliyyətə başlayırlar və bu da ciddi risklər yaradır.
O, Qida Təhlükəsizliyi Agentliyinə qarşı səsləndirilən tənqidlərin əksər hallarda əsassız olduğunu bildirib: “Bu qurumun vəzifəsi nöqsanları aşkarlamaq və qarşısını almaqdır. Əgər bu nəzarət olmasa, vəziyyət daha ağır olar”.
Mütəxəssis istehsal prosesində temperatur rejiminə əməl olunmasının vacibliyini də vurğulayıb. Onun sözlərinə görə, xüsusilə ət, toyuq və balıq kimi riskli məhsulların emalı zamanı mühit temperaturu nəzarətdə saxlanmalıdır. Həmçinin qida məhsulları müvafiq soyuducularda, əsasən +4°C–+5°C temperaturda saxlanılmalıdır.
Sonda o, sahibkarlara müraciət edərək qida təhlükəsizliyi sahəsində bilik və sertifikatlara malik mütəxəssislərlə işləməyin vacibliyini qeyd edib: “Ən azı HACCP və ISO 22000 standartlarını bilən aşpaz və işçilərin cəlb olunması vacibdir. Sahibkarlar başa düşməlidirlər ki, təqdim etdikləri qidanın sağlamlığı birbaşa onların məsuliyyətidir”.
Zəhra Ağayeva
