Xalq Sığorta 2025-ci il üzrə maliyyə nəticələrini açıqlayıb. Şirkət ötən ili 6 milyon 5 min manat xalis mənfəətlə başa vurub. Bu göstərici 2024-cü ildə qeydə alınmış 4 milyon 791 min manat mənfəətlə müqayisədə daha yüksəkdir.
Maliyyə hesabatına əsasən, 2025-ci ildə şirkətin ümumi gəlirləri 30 milyon 885 min manat təşkil edib ki, bu da illik müqayisədə 7,1 % artım deməkdir. Hesabat dövründə xərclər 25 milyon 90 min manat olub və əvvəlki ilə nisbətən 0,9 % artıb.
Şirkət il ərzində 1 milyon 615 min manat fövqəladə gəlir əldə edib ki, bu da əvvəlki illə müqayisədə 51,9 % çoxdur. Eyni zamanda fövqəladə xərclər 909 min manat təşkil edib və bu göstərici 3,9 dəfə artım göstərib. 2025-ci ildə şirkət 497 min manat mənfəət vergisi ödəyib, halbuki əvvəlki ildə mənfəət vergisi ödənişi olmayıb.
2026-cı ilin 1 yanvar tarixinə olan məlumata görə, şirkətin aktivləri 93 milyon 484 min manata çatıb ki, bu da 5 % artım deməkdir. Bu dövrdə öhdəliklər 29 milyon 631 min manata enərək 0,5 % azalıb, balans kapitalı isə 63 milyon 854 min manata yüksələrək 7,8 % artıb.
Qeyd edək ki, Xalq Sığorta 2004-cü ildə yaradılıb. Şirkətin nizamnamə kapitalı 58 milyon 750 min manatdır. Səhmlərin 50 %-i “İdeal Business Co.” MMC-yə, digər 50 %-i isə “Euro Standard” MMC-yə məxsusdur. “Euro Standard” MMC isə Xalq Bank ASC-nin 33,85 %-lik səhmdarıdır.
