“İran-ABŞ müharibəsində nə udan, nə də uduzan oldu. Milləti qorumaq üçün müharibələri dayandırmaq lazımdır. Həmişə məsələləri sülhlə həll etməyə çalışmaq gərəkdir. Çox adam deyir ki, “İran uddu”. Necə qələbə qazandı? Hizbullah daxil, terrorçu qruplaşmaları aradan qaldırdılar. Hərbi cəhətdən İran gücünü itirdi. ABŞ isə heç vaxt müharibədə nəsə itirməyib. İllərdir, Amerika öz dediyini sonadək yeridir. Güclü olan Tramp deyil, Amerikadır. ABŞ-yə lazım idi ki, müharibədə Rusiya və Çin kənarda qalsın. Müharibədə əsas məqsəd neft və qaza yiyələnmək, terrorçuları öldürmək idi. Şahı gətirmək isə Amerikanın ən böyük səhvi olardı. Millət yadından çıxartmayıb ki, şah hakimiyyəti onların başına nə gətirib”.
Bu sözləri Pravda.az-a açıqlamasında hüquq müdafiəçisi Novella Cəfəroğlu deyib.
O bildirib ki, İranın gücünü molla rejimi zəiflədib: “İran millətinin hazırda normal dövləti qurmaq özündən asılıdır. Əks halda, sona qədər başlarında mollalar dayanacaqlar, uçurumdan qayıda bilməyəcəkələr. Bu rejim müsəlman dövlətləri ilə İranı küsdürdü. Elə bir müsəlman ölkəsi qalmadı ki, ora bomba atmasın. Arzu edirəm ki, doğrudan da, sülh olsun. "İran uddu" ifadəsi İranı, Amerikanı tanımayan insanların xülyasıdır. İran heç də udmadı. İran milləti Məsud Pezeşkianla bir yerdə normal demokratik dövlət qursun ki, bizim üçün də sakitlik olsun. Bu müharibədə ən gözəl və düzgün siyasəti Azərbaycan dövləti apardı. Bunun nə demək olduğunu sonra biləcəksiniz. İran yaxın qonşudur, 30 il bizi blokadada saxladı, erməniləri dəstəklədi. Torpaqlarımızın uzun illər işğal altında qalmasına səbəb məhz İran idi. Vətən müharibəsində qalib gəlməklə gücümüzü dünyaya göstərdik. Öz gücümüzlə torpaqlarımızı düşməndən azad etdik. Buna görə də ABŞ-İran müharibəsində də özümüzü çox yüksək səviyyədə apardıq, Prezident İlham Əliyev düşünülmüş siyasət yeritdi. Bir sözlə, bu müharibədə ən çox Azərbaycan uddu”.
Aytəkin Qardaşova
