Yaxın Şərqdə geosiyasi gərginlik və diplomatik danışıqların taleyi ilə bağlı müzakirələr davam edir. Xüsusilə İran ətrafında aparılan proseslər regionda həm siyasi, həm də hərbi balansın gələcəyinə təsir edən əsas amillərdən biri kimi qiymətləndirilir. Ekspertlər bildirirlər ki, mövcud vəziyyət danışıqların nəticəsindən asılı olaraq yeni eskalasiya risklərini də gündəmə gətirə bilər.
Sultan Zahidov News365.az-a açıqlamasında İranla aparılan danışıqlar və regiondakı gərgin vəziyyətlə bağlı fikirlərini bölüşüb.
Politoloqun sözlərinə görə, Tehran üçün danışıqlar masasında həm iqtisadi dayanıqlıq, həm də dövlət maraqlarının qorunması əsas prioritet olaraq qalır. O bildirib ki, tərəflər arasında mövcud ziddiyyətlər razılaşma prosesini çətinləşdirir və nəticədə diplomatik səylərin uğursuzluqla nəticələnmə ehtimalı artır.
Ekspert qeyd edib ki, əgər danışıqlarda razılıq əldə olunmazsa, prosesin yenidən hərbi qarşıdurmaya çevrilməsi riski istisna edilmir. Onun sözlərinə görə, hazırkı mərhələdə tərəflərin əsas məqsədlərinə müəyyən dərəcədə çatdığı müşahidə olunur.
Sultan Zahidov əlavə edib ki, regionda, xüsusilə Suriya və Livan istiqamətində gərginlik davam edir. O bildirib ki, Hizbullah faktorunun bölgədəki proseslərə təsiri diqqət mərkəzində qalır.
Politoloqun fikrincə, yaxın dövrdə vəziyyətin daha da kəskinləşməsi və hərbi toqquşma ehtimalının yenidən gündəmə gəlməsi mümkündür.
