Qlobal neft tədarükü ABŞ-İsrail və İran arasındakı müharibənin təsiri ilə mart ayında əvvəlki aya nisbətən gündəlik 10 milyon 120 min barel azalaraq tarixin ən böyük düşüşünü yaşayıb.
AFN.az xəbər verir ki, Beynəlxalq Enerji Agentliyinin (IEA) Neft Bazarı Hesabatına görə, ötən ay Yaxın Şərqdəki enerji infrastrukturuna hücumlar və Hörmüz boğazından tanker keçidlərinə tətbiq edilən məhdudiyyətlər səbəbindən neft tədarükü kəskin şəkildə azalıb.
Bu dövrdə OPEC və bəzi qeyri-OPEC ölkələrindən ibarət OPEC+ qrupunun gündəlik istehsalı 9 milyon 360 min barel azalaraq 42 milyon 390 min barelə geriləyib. Gündəlik istehsal həcmi Səudiyyə Ərəbistanında 3 milyon 150 min, İraqda 3 milyon, Küveytdə 1 milyon 350 min, Birləşmiş Ərəb Əmirliklərində 1 milyon 270 min barel azalıb. Bu ciddi itkilər Qazaxıstan başda olmaqla bəzi üzv ölkələrin istehsal artımı ilə qismən kompensasiya edilib.
Mart ayında OPEC+ xaricindəki ölkələrin ümumi gündəlik istehsalı isə 770 min barel azalaraq 54 milyon 660 min barel təşkil edib. Bu azalmada əsasən Qətərdəki istehsal kəsintiləri həlledici rol oynayıb; ölkədə gündəlik istehsal 1 milyon 450 min barel azalaraq 370 min barel səviyyəsinə düşüb. Bununla belə, Braziliyadakı rekord istehsal və ABŞ-dakı tədarükün bərpası qlobal istehsaldakı azalmanı müəyyən dərəcədə tarazlayıb.
Ümumilikdə qlobal neft tədarükü martda 97 milyon 50 min barelə enib ki, bu da tarixin ən böyük tədarük kəsintisi kimi qeydə alınıb. İqtisadi görünüşün zəifləməsi fonunda IEA neft tələbi ilə bağlı artım gözləntisini dəyişərək, bu il üçün gündəlik 80 min barellik azalma proqnozlaşdırıb. İlin ikinci rübündə gözlənilən gündəlik 1,5 milyon barellik tələb azalmasının COVID-19 pandemiyasından bəri ən kəskin geriləmə olduğu bildirilir.
