Vaşinqtonda onilliklərdən sonra keçirilən ilk birbaşa təmaslardan sonra tərəflər qarşılıqlı razılaşdırılmış vaxtda və yerdə danışıqları davam etdirməyə razılaşıb, ABŞ isə prosesin daha geniş sülh sazişinə çevriləcəyinə ümid etdiyini bəyan edib...
Poliqon xəbər verir ki, CNN telekanalının yaydığı məlumata görə, ABŞ Dövlət Departamentinin nümayəndəsi Vaşinqtonda çərşənbə axşamı baş tutan birbaşa görüşdən sonra İsrail və Livanın qarşılıqlı razılaşdırılmış vaxtda və razılaşdırılmış məkanda növbəti birbaşa danışıqları keçirmək barədə razılığa gəldiyini açıqlayıb.
Məlumata görə, bu görüş tərəflər arasında son onilliklərdə keçirilən ilk birbaşa danışıqlar kimi qiymətləndirilir. ABŞ tərəfi müzakirələr zamanı ümid etdiyini bildirib ki, danışıqlar 2024-cü il razılaşmasının çərçivəsini aşa və nəticədə hərtərəfli sülh sazişinə gətirib çıxara bilər.
Vaşinqton bir daha vurğulayıb ki, hərbi əməliyyatların dayandırılması ilə bağlı istənilən razılaşma iki ölkənin hökumətləri arasında və yalnız ABŞ-nin vasitəçiliyi ilə əldə olunmalıdır. Bununla ABŞ prosesdə əsas vasitəçi rolunu qoruduğunu və alternativ diplomatik kanalları qəbul etmədiyini açıq şəkildə nümayiş etdirib.
ABŞ tərəfi həmçinin bildirib ki, bu danışıqlar Livanın iqtisadiyyatının bərpasına mühüm töhfə verə, eyni zamanda hər iki ölkə üçün investisiya imkanlarını genişləndirə bilər. İsrail isə bəyan edib ki, bütün açıq qalan məsələlərin həlli və regionda təhlükəsizlik, sabitlik və rifahı gücləndirəcək davamlı sülhün əldə olunması üçün birbaşa danışıqlarda iştirak etməyə sadiqdir.
Livan tərəfi isə öz növbəsində 2024-cü ilin noyabrında elan olunmuş hərbi əməliyyatların dayandırılması barədə razılaşmanın tam şəkildə icrasının vacibliyini vurğulayıb. Beyrut ərazi bütövlüyü və tam dövlət suverenliyi prinsiplərini önə çəkərək atəşkəsə çağırıb və ölkənin münaqişə nəticəsində üzləşdiyi ağır humanitar böhranın yüngülləşdirilməsi üçün konkret addımların atılmasını tələb edib.
Baş tutan görüş göstərir ki, Vaşinqton bölgədə gərginliyin azaldılması üçün İsrail və Livanı daha geniş siyasi prosesə cəlb etməyə çalışır. Bununla belə, tərəflərin prioritetləri fərqli olaraq qalır və bu səbəbdən birbaşa danışıqların gələcəkdə hansı nəticə verəcəyi hələlik açıq sual kimi qalır.
Poliqon.info
