Qazaxıstan ilə Türkiyə arasında nəqliyyat və logistika sahəsində əməkdaşlıq strateji səviyyəyə çatıb.
AZƏRTAC Qazaxıstan mediasına istinadla xəbər verir ki, Baş nazir Oljas Bektenov bu açıqlamanı Türkiyənin vitse-prezidenti Cevdet Yılmazın iştirakı ilə keçirilən Ticarət və İqtisadi Əməkdaşlıq Komissiyasının iclasında verib.
Bektenovun sözlərinə görə, 2025-ci ilin sonuna qədər iki ölkə arasında dəmir yolu ilə yükdaşımalarının həcmi 35 faiz artacaq və 6,4 milyon tona çatacaq. Trans-Xəzər Beynəlxalq Nəqliyyat Marşrutu boyunca yükdaşımalarının həcmi 4 milyon tonu keçib.
Baş nazir qeyd edib ki, Orta Dəhlizin rolu əhəmiyyətli dərəcədə güclənib, yükdaşımalarının həcmi beş dəfədən çox artıb və yüklərin çatdırılma müddəti 13 günə endirilib. Trans-Xəzər Beynəlxalq Nəqliyyat Marşrutunun (TITR) inkişafı ortaq prioritetdir - infrastrukturun modernləşdirilməsi, liman və terminal tutumunun genişləndirilməsi, vahid tariflərin yaradılması və rəqəmsal həllərin tətbiqi üçün sistemli işlər görülür.
Trans-Xəzər Beynəlxalq Nəqliyyat Marşrutu, həmçinin Orta Dəhliz kimi də tanınır və Çini Qazaxıstan, Xəzər dənizi, Azərbaycan, Gürcüstan və Türkiyə vasitəsilə Avropa ölkələri ilə birləşdirir.
