Birləşmiş Ərəb Əmirliklərinin (BƏƏ) Sənaye və Qabaqcıl Texnologiyalar naziri, ADNOC və onunla əlaqəli şirkətlərin baş meneceri və baş direktoru Dr. Sultan Əhməd əl-Caber Hörmüz boğazındakı hadisələrlə bağlı danışarkən qlobal iqtisadiyyatın gələcək qeyri-müəyyənliyə davam gətirə bilməyəcəyini vurğulayıb.
Hafta.az yazır ki, Dr. Sultan Əhməd əl-Caber qlobal iqtisadiyyat üçün risklərə diqqət çəkərək bu vacib su yolunun qlobal dəniz nəqliyyatına qeyd-şərtsiz açıq qalmalı və hər hansı formada təhdid edilməməli olduğunu bildirib.
“X” platformasındakı paylaşımda əl-Caber bildirib: “Hörmüz boğazı qlobal su yoludur və əvvəlki kimi dünyaya qayıtmalıdır”.
Hörmüz boğazının bağlanmasının təsirlərinə toxunan əl-Caber qeyd edib ki, təxminən 600 milyon barel neft daşınması dayandırılıb. O, bu vəziyyətin qlobal enerji təchizatına ciddi təzyiq göstərdiyini nəzərə çatdırıb.
Əl-Caber həmçinin mayeləşdirilmiş təbii qaz, reaktiv yanacaq, gübrə və digər vacib məhsullara artan təzyiqi vurğulayaraq bildirib ki, itirilən hər barel dünya miqyasında istehlakçılar üçün xərcə çevrilir.
Nazir açıqlamasında Hörmüz boğazından təhlükəsiz keçid üçün pul ödəməyin qəbuledilməz olduğunu bildirib və bunu "şantaj" adlandırıb.
