Liam Rosenyor “Çelsi”dən göndərildi – Rəsmi

Futbol üzrə İngiltərə Premyer Liqasında uğursuz mövsüm keçirən “Çelsi” baş məşqçisi Liam Rosenyor ilə yollarını ayırıb.

Arena.az xəbər verir ki, bu barədə London klubunun mətbuat xidməti məlumat yayıb.

İngiltərə klubu rəsmi açıqlamasında mütəxəssisə göstərdiyi fəaliyyətə görə təşəkkür edib və onun peşəkarlığını yüksək qiymətləndirib.

Bununla yanaşı, qərarın asan verilmədiyi vurğulanıb. Bildirilib ki, son nəticələr və komandanın çıxışı klubun gözləntilərindən aşağı olub. Mövsümün sonunadək “zadəganlar”ı müvəqqəti olaraq Kallum MakFarlan çalışdıracaq.

Qeyd edək ki, “Çelsi” İngiltərə Premyer Liqasının cari mövsümündə topladığı 48 xalla 7-ci pillədə qərarlaşıb. “Zadəganlar” 34 oyunda 13 qələbə qazanıb, 9 heç-heçə edib, 12 məğlubiyyətə üzülüblər. Komanda ardıcıl 5 oyun idi Premyer Liqada məğlubiyyətə üzülürdü, üstəlik rəqib qapılarına qol da vura bilmirdi.

Liam Rosenyor bu ilin yanvarında “Çelsi”yə baş məşqçi təyin edilmişdi. İngilis mütəxəssisin klubla 2032-ci ilin 30 iyununadək müqaviləsi vardı. O, bu postda Entso Mareskanı əvəz etmişdi. İngilis məşqçi London təmsilçisini 23 matça çıxarıb, 11 qələbə, 2 heç-heçə, 10 məğlubiyyət görüb.

Rosenyor daha öncə İngiltərənin “Hall Siti”, Fransanın “Strasburq” komandalarını çalışdırıb, “Brayton” və “Derbi Kaunti”də köməkçi-məşqçi kimi işləyib.