Alimlər tərəfindən "adsız 19-cu mağara" kimi tanınan bu yer uzun illərdir yerli amerikalıların qayaüstü rəsmləri ilə məşhurdur...
Poliqon xəbər verir ki, Daily Galaxy nəşrinin yazdığına görə, burada aparılan yeni tədqiqatlar müasir 3D görüntüləmə texnologiyası sayəsində əvvəllər görünməyən təsvirləri üzə çıxarıb.
Arxeoloqlar təxminən 1000 il əvvələ aid edilən bir neçə böyük qlif və 3 metr uzunluğunda nəhəng rəsmi müəyyən ediblər. Bu təsvirlər uzun illər ərzində diqqətdən yayınmışdı, çünki mağaranın tavanı çox alçaq olub və rəsmlərin tam şəkildə görünməsini çətinləşdirib.
Tədqiqatçılar bildirirlər ki, bu məkan sadəcə sığınacaq deyil, həm də Cənub-Şərqi ABŞ-dakı yerli icmalar üçün dərin dini və mənəvi əhəmiyyət daşıyıb.
Ən diqqətçəkən tapıntı isə 3 metr uzunluğunda çıngırdayan ilan təsviridir. Romboşəkilli naxışları ilə tanınan bu fiqurun Crotalus atrox növünə bənzədiyi qeyd olunur. Antiquity jurnalında dərc edilən araşdırmaya görə, bu heyvan yerli xalqlar tərəfindən müqəddəs hesab edilirdi.
Tədqiqatın müəlliflərindən Tennessi Universitetinin professoru Yan Simek Science jurnalına açıqlamasında bildirib ki, əvvəllər bu regionun mağaralarında belə iri təsvirlərin olduğu sənədləşdirilməyib və bu kəşf qayaüstü sənət barədə anlayışları dəyişir.
"Bu təsvirlər xüsusi əhəmiyyət daşıyır, çünki indiyə qədər bu bölgədən böyük fiqurlar məlum deyildi. Bu, bizə göstərir ki, bu mağaralarda hələ çox şey gizli qala bilər", deyə o qeyd edib.
Alimlər fotogrammetriya üsulundan istifadə edərək yüzlərlə fotoşəkili birləşdirib mağaranın üçölçülü modelini yaradıblar. Bu üsul əvvəllər görünməyən detalları aşkarlamağa imkan verib.
Tədqiqatçı Stiven Alvaresin sözlərinə görə, rəqəmsal model vasitəsilə rəsmlərə virtual işıq salınaraq gizli qalmış fiqurlar müəyyən edilib.
Mağara 5 kilometrdən çox uzanır və ilk dəfə 1998-ci ildə sənədləşdirilib. Əvvəlki araşdırmalar burada geniş bir zalın mövcud olduğunu göstərmişdi.
Alimlər qeyd edirlər ki, bu cür tapıntılar yerli xalqların yeraltı dünyaya dair inamları və ritual ənənələri ilə bağlı yeni elmi baxış formalaşdırır.
Poliqon.info
