Rusiya Prezidentinin mətbuat katibi Dmitri Peskov G20 sammitində ölkəni kimin təmsil edəcəyi ilə bağlı məsələyə aydınlıq gətirərək, bu barədə hələlik yekun qərarın verilmədiyini bildirib.
Musavat.com xəbər verir ki, Kreml rəsmisi Rusiyanın G20 xətti ilə fəaliyyətini aktiv şəkildə davam etdirdiyini vurğulayıb. Peskov həmçinin daxili məsələlərə toxunaraq, Prezident Vladimir Putinin Dağıstanda evlərin, o cümlədən rəsmiləşdirilməmiş tikililərin bərpasına kömək göstərilməsi barədə xüsusi tapşırıq verdiyini və bu məsələnin təcili şəkildə həll edildiyini qeyd edib.
Dağıstanın Təbii Sərvətlər Nazirliyində aparılan axtarışlarla bağlı sualları cavablandırmaqdan imtina edən sözçü, hüquq-mühafizə orqanlarına müraciət etməyi tövsiyə edib. Enerji bazarı barədə danışan Peskov, Rusiyanın neft ixracını uğurla davam etdirdiyini və dünya bazarında tələbatın artdığını bildirsə də, OPEC+ çərçivəsində hasilat həcmlərinin dəyişdirilməsi ilə bağlı hələlik heç bir təşəbbüsün olmadığını diqqətə çatdırıb.
Günün mühüm diplomatik hadisəsi kimi isə Vladimir Putinin bu gün Qırğızıstan Prezidenti Sadır Japarovla keçirəcəyi görüş xüsusi qeyd olunub.
Musavat.com
