Aparılan tədqiqatlar göstərir ki, insanların yalnız 6%-i uşaqlıqda arzuladıqları peşədə işləyir.
Yeniavaz.com xəbər verir ki, bu barədə “Social Forces” jurnalında dərc edilən araşdırmada qeyd edilib.
Tədqiqat 11–15 yaş arası 1693 oğlan və 1667 qız uşağı üzərində aparılıb, onların sonrakı iş həyatı isə uzunmüddətli izləmə əsasında təhlil edilib.
Nəticələrə əsasən, uşaqların cinsiyyətə uyğun sayılan peşələrə yönəlməsi onların gələcəkdə həmin sahələrdə işləmə ehtimalını iki dəfə artırır. Bununla belə, ümumi mənzərə göstərir ki, insanların çox az hissəsi uşaqlıqda xəyal etdiyi peşəyə sahib olur.
Araşdırmada qeyd olunur ki, bu proses iki əsas amildən asılıdır: ailə mühiti və uşağın psixoloji xüsusiyyətləri. Ailədə valideynlərin peşəsi və evdə gender rollarının bölüşdürülməsi uşaqların peşə seçimlərinə birbaşa təsir göstərir. Ev işlərinin ənənəvi bölgüsünün olduğu ailələrdə oğlanlar adətən kişiyə xas peşələrə yönəlirlər. Lakin bu tendensiya qızlara eyni dərəcədə təsir etmir. Belə ailələrdən olan qızlar qadına xas peşələri seçməyə daha az meylli olurlar.
Digər mühüm faktor valideynlərin təhsil səviyyəsidir. Ali təhsilli valideynlərin qızları daha çox rəhbər vəzifələrə, direktor, menecer kimi peşələrə yönəlirlər. Bu sahələr isə adətən qadınların az təmsil olunduğu peşələrdir. Oğlanlarda isə ali təhsilli valideynlərin təsiri daha balanslı seçimlər formalaşdırır və gender stereotiplərindən kənar peşələrə yönəlmə artır.
