525.az saytından verilən məlumata əsasən, ain.az məlumatı açıqlayır.
Lətif ŞÜKÜROĞLUTarix üzrə fəlsəfə doktoru
Bu gün tanış edəcəm anamla gəlinini.
Deyir, bir gətir görüm halını, təhərini.
Yəqin xoşum gələcək balamın seçimindən,
Bunu mənə demədi, oxudum gözlərindən.
O gözlərin kədəri hara itmişdi görən,
Anam aşiqmi olub gəlinini görmədən?
Birdən qəlbinə yatmaz, onda necə olacaq,
Bu qara şübhə məni əldən salıb yoracaq.
Azı yüz yol deyibdi, təki balam evlənsin.
Mənim də ocağımdan nəvə səsləri gəlsin.
Hələ görməmiş sevir gəlinin boy-buxunun,
Heç soraq da eləmir uzağın, ya yaxının.
Atasının oğludur, kimi seçdiyin bilər.
Dərd anamı qocaldıb, indi qəddi düzələr.
Oğul belə düşünür, ana ümidlənibdi,
Sanasan, kasıb evə göydən nur ələnibdi,
Yuxu ərşə çəkilib, səhər açılmaq bilmir,
Bu gədə nə bərk yatıb, görüşə gecikirmi?
Ana qəlbi narahat, oyatmağa da qıymır,
Anama elə gəlir, bir kimsə onu duymur.
lll
Yaratdığın bəndəyə,
Bir yol göstər, İlahi.
Şeytan azdırıb nədir,
Hər gün artır günahı.
Əlləri qan içində,
Gözün də qan tutubdur.
Kin at çapır içində,
Ruhu candan uçubdur.
Dərgahına gəlməyə
Üz qalmayıb bəndəndə,
Cəllad, ya qatil olub,
Özün salıb kəməndə.
Yeri-göyü bürüyüb
Körpələrin naləsi.
Dünya zülmət içində,
De, yoxmu bir çarəsi?
Ukraynalı gözələ
O doğma çöllər kimi
Qəlbin necə genişdi.
Dünya yəqin ki səndən
gözəlin görməmişdi.
Taleyin gətirmədi
Parçalandı ürəyin.
Mərmilər yağan gündən
Qəhr oldu duz-çörəyin.
Üzülmə, bahar gəlir
Sənin bəxtin də gülər.
Baxçanda bitirdiyin
Qızılgüllər dirçələr.
Sənə dua edənin
Tanrı köməyi olsun.
Qəlbində açan çiçək
Sevgi gərəyi olsun.
lll
Bircə baxışın da ömrə bəs idi,
Yağdı taleyinə mərmilər, gözəl.
Şirin nəğmələrin xoş təsəlliydi,
Beşikdəcə susdu ninnilər, gözəl.
O sevən qəlbində dərd qalaqlandı,
Köksünə amansız xəncər saplandı.
Torpağın, daşın da od tutub yandı
Nə qara yazıldı, bu günlər, gözəl.
lll
Bərəkətli çöllərin
Nərgizi, laləsiydin,
Sən həsrət könüllərə
Sevgi təsəllisiydin.
İndi qanın tökülür
Gül dərdiyin çöllərə.
De, bəxtmi üz döndərdi,
Düşdün qərib ellərə.
Neçə min əllər göydə,
Dualar səninlədir.
Nəğməndən qopan pərdə
Yeri, göyü inlədir.
Ancaq boyun əymə sən
Taleyin gərdişinə.
Əmin ol ki, doğacaq
Yenə günəş bəxtinə.
lll
Ay Allahım, yenə özün kömək ol,
Mürvət elə mən bu ildən qurtarım.
Aman vermə, bəd niyyətə, bəd sözə,
Paxıl qəlbdən, yaman dildən qurtarım.
Sən böyüksən, hər ürəyi bilirsən.
Ərşi, fərşi nələr varsa, görürsən.
Yaratdığın bəndəni ki sevirsən,
Lütf göstər, fənd-feldən qurtarım.
Dəyərsizdir dünya malı gözümdə,
Doğru dedim, bütöv oldum sözümdə.
Dağdan ağır yük olsa da dizimdə,
Dözər, bircə fitnə-şərdən qurtarım.
Son axtarma, əvvəldəydi sonun da,
Xeyir olmaz hər cür yolun sonunda.
Ağrısı var, acısı var sonun da,
Saman göndər, mən bu seldən qurtarım.
lll
Günəşli günlərdə kölgəsini əsirgəməyən ağac,
Bərəkətini gizlətməyən torpaq kimi ol.
Çöl-çəmənə həyat verən yağış,
ürkək qəlbə ümid dolu baxış ol.
Bir çiçək inadına torpağı, daşı dələn su,
Qayanın bozluğuna rəng qatan çiçək,
Bir ömrü nurlandıran sevgi dolu ürək ol.
lll
Sərib xəzəl donun bağa-bağçaya,
Harasa yamanca tələsir payız.
Nəmli gözlərilə baxıb dünyaya,
Yaşıl yamaclara nur səpir payız.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
