Avstraliyalı alimlər təmas zamanı virusların qılafını parçalayan xüsusi nanoplyonka hazırlayıblar. Melburn Kral Texnologiya İnstitutunun tədqiqatçıları bu texnologiyanı hazırlayarkən cırcırama və iynəcə qanadlarının mikrorelyefindən ilhamlanıblar.
Tədqiqatın nəticələri "Advanced Science" jurnalında dərc olunub.
Materialın əsasını nanometr ölçülü "sütunlar"la örtülmüş nazik və elastik akril səth təşkil edir. Bu strukturlar mexaniki təsir göstərir: virus plyonkanın üzərinə düşdükdə, həmin sütunlar virusun qılafını dartaraq parçalayır və onu çoxalma qabiliyyətindən tamamilə məhrum edir.
Mütəxəssislər prototipi bronxiolit və pnevmoniyaya səbəb ola bilən 3-cü tip insan paraqrip virusu (hPIV-3) üzərində sınaqdan keçiriblər. Eksperimentlər göstərib ki, virus hissəciklərinin təxminən 94%-i səthlə təmasdan cəmi bir saat sonra məhv edilib və ya ciddi zədələnib.
Tədqiqat müəllifləri qeyd ediblər ki, bu yanaşma ənənəvi dezinfeksiya üsullarından köklü şəkildə fərqlənir. Kimyəvi vasitələrdən fərqli olaraq, yeni plyonka toksik iz buraxmır və mikroorqanizmlərdə müqavimət (rezistentlik) yaratmır. Həmçinin material səthlərə zərər vermir və ondan dəfələrlə istifadə etmək mümkündür.
İşlənib hazırlanmış materialı adi qablaşdırma plyonkası kimi rulonlar şəklində istehsal etmək olar. Bu isə ondan smartfon ekranlarından tutmuş tibbi avadanlıqlara qədər bütün çoxistifadəli səthlərdə yararlanmağa imkan verir. Alimlər gələcəkdə bu texnologiyanın tibb müəssisələri və ictimai məkanlarda effektivliyini yoxlamağı planlaşdırırlar.//Demokrat.az
