Böyük Britaniya kralı III Çarlzın bu həftə ABŞ-a səfəri münasibətlərin yaxşılaşdırılmasına yönəlib və aylarla davam edən yüksək səviyyəli strateji hazırlığın nəticəsidir...
Poliqon xəbər verir ki, Politico-nun yazdığına görə, çoxsaylı gündəm maddələri arasında yalnız qısa bir əsas prioritet siyahısı olacaq. Hazırlıq prosesindən xəbərdar olan mənbələrdən biri bildirib: "Kral yəqin ki, yalnız bir məsələdə irəliləyiş əldə edə biləcək, sual budur ki, bu hansı məsələ olacaq".
Nəşrin məlumatına əsasən, əsas namizəd Rusiya–Ukrayna müharibəsidir. ABŞ prezidenti Donald Trampın son aylarda bu mövzudan uzaqlaşdığı qeyd olunur.
Jurnalistlər yazır ki, Rusiyanın Ukraynaya qarşı müharibəsi Britaniyanın diplomatik hədəflərinin mərkəzində dayanır və kralın şəxsi prioritetləri ilə də üst-üstə düşür. Mənbə bildirib: "Bu, kralı həqiqətən narahat edən məsələdir. Texnologiyalardan və ya digər əlaqə sahələrindən daha çox".
Bundan əlavə, monarxın NATO-nun Arktikada Rusiyaya qarşı fəaliyyətləri də daxil olmaqla, iki ölkənin müdafiə əlaqələrini vurğulamaq niyyətində olduğu bildirilir.
Keçən ilin payızında kral III Çarlz Vindzor qəsrində keçirilən dövlət ziyafəti zamanı Trampa Ukraynaya dəstəyin vacibliyini xatırlatmışdı. Geosiyasi mövzulara birbaşa toxunulmayan çıxışda Ukraynanın qısa şəkildə xatırladılması diqqət çəkmişdi.
Bu ilin yanvarında isə kral III Çarlz Böyük Britaniyanın Ukraynaya sadiqliyini bir daha təsdiqləyib. Böyük Britaniya–Ukrayna tərəfdaşlığının 100 illiyi münasibətilə göndərdiyi müraciətdə o bildirib: "Ukraynanın ədalətli və davamlı sülhə nail olacağına, onun təhlükəsizliyinin, suverenliyinin və rifahının təmin ediləcəyinə dərin ümidimi ifadə etmək istəyirəm. Biz sizinləyik".
Poliqon.info
