“Son həftələrdə Bakıya doğru uzanan diplomatik marşrut təsadüfi deyil. Andrej Babiş, Volodimir Zelenski, Edqars Rinkeviçs və İnqa Ruqinienenin ardıcıl səfərləri bir reallığı açıq göstərir ki, Bakı artıq yalnız regionun deyil, daha geniş geosiyasi məkanın cazibə mərkəzinə çevrilib”.
Bunu Azreform.info -a açıqlamasında Milli Məclisin deputatı Asif Əsgərov deyib.
Bakı – yeni geosiyasi cazibə mərkəzi
O qeyd edib ki, bu səfərlərin zamanlaması xüsusilə diqqət çəkir: “Qlobal gərginliyin artdığı, Avropa təhlükəsizlik arxitekturasının yenidən formalaşdığı bir dövrdə Şərqi Avropa liderlərinin istiqamətinin Bakıya yönəlməsi Azərbaycanın artan strateji çəkisinin göstəricisidir.
Prezident İlham Əliyevin rəhbərliyi ilə yürüdülən balanslaşdırılmış xarici siyasət ölkəni qarşıdurma yox, dialoq platformasına çevirib. Bakı bu gün həm Qərb, həm də digər güc mərkəzləri üçün etibarlı tərəfdaş və neytral koordinasiya məkanı kimi çıxış edir.
Ukrayna xətti: siyasi etimadın dərinləşməsi
Volodimir Zelenskinin 25 aprel səfəri Azərbaycan–Ukrayna münasibətlərinin artıq formal diplomatik çərçivəni aşdığını bir daha təsdiqlədi. Son illərdə liderlər arasında 7 dəfə görüşün keçirilməsi sadəcə statistika deyil, sistemli və davamlı siyasi dialoqun göstəricisidir.
Bu münasibətlərin əsas sütunu qarşılıqlı ərazi bütövlüyünə və suverenliyə verilən dəstəkdir. Bu prinsipial mövqe hər iki ölkəni beynəlxalq münasibətlər sistemində bir-birinə daha da yaxınlaşdırır.
Eyni zamanda enerji sahəsində əməkdaşlıq xüsusi çəkisi ilə seçilir. SOCAR-ın Ukrayna bazarındakı fəaliyyəti yalnız iqtisadi deyil, həm də strateji dayanıqlılıq faktorudur. Enerji təhlükəsizliyi məsələsinin Avropa üçün həyati əhəmiyyət daşıdığı bir dövrdə bu əməkdaşlıq daha geniş geosiyasi məna kəsb edir”.
Baltik xətti: Avropanın Bakıya yönəlməsi
Deputat əlavə edib ki, Latviya və Litva liderlərinin səfərləri isə başqa bir tendensiyanı göstərir: “Baltik regionu Azərbaycanı artıq alternativ enerji və logistika tərəfdaşı kimi deyil, siyasi koordinasiya mərkəzi kimi qəbul etməyə başlayır.
Edqars Rinkeviçsin Bakıya səfəri zamanı verilən mesajlar Avropa İttifaqı daxilində Azərbaycanın roluna artan marağın göstəricisidir. Bu, xüsusilə enerji marşrutlarının diversifikasiyası və Orta Dəhlizin inkişafı kontekstində mühüm əhəmiyyət daşıyır.
Çexiya istiqaməti: iqtisadi diplomatiyanın yüksəlişi
Andrej Babişin səfərini müşayiət edən geniş biznes heyəti bir məqamı aydın göstərdi: Bakı artıq yalnız siyasi deyil, iqtisadi qərarların da verildiyi platformadır.
Çexiya ilə əməkdaşlıq sənaye, texnologiya və investisiya sahələrində yeni imkanlar açır. Bu isə Azərbaycanın enerji ölkəsi imicindən çıxaraq çoxşaxəli iqtisadi tərəfdaş kimi mövqelənməsinin bariz nümunəsidir.
Bakı modeli: balans, praqmatizm və strateji baxış
Bu ardıcıl səfərləri birləşdirən əsas xətt Azərbaycanın formalaşdırdığı “Bakı modeli”nin nəticəsidir. Bu model balanslaşdırılmış xarici siyasət, praqmatik əməkdaşlıq yanaşması, qarşılıqlı maraqlara əsaslanan tərəfdaşlıqdan ibarətdir. Bu model qarşıdurmaların dərinləşdiyi dünyada nadir nümunələrdən biridir. Azərbaycan nə blok siyasətinin əsiri olur, nə də təcrid olunmuş xətt seçir – əksinə, müxtəlif güc mərkəzlərini bir masa arxasında toplaya bilir.
Bu gün Bakı sadəcə görüşlərin keçirildiyi şəhər deyil – qərarların formalaşdığı, yeni geosiyasi konfiqurasiyanın cizgilərinin çəkildiyi məkandır.
Şərqi Avropadan Baltik regionuna qədər uzanan liderlərin Bakıya axını bir daha sübut edir: Azərbaycan artıq oyunun iştirakçısı yox, qaydaları müəyyən edən aktorlardan birinə çevrilir.
Və bu proses hələ başlanğıcdır – qarşıdakı mərhələdə Bakının rolu daha da böyüyəcək, təsir dairəsi isə regional çərçivəni aşaraq qlobal səviyyəyə yüksələcək”.
Mürtəza
