Oliqarxların bir hissəsi ölkəni tərk edir, digərləri isə mümkün siyasi dəyişikliklərə hazırlaşır...
Macarıstanda biznes elitasının bir hissəsi Baş nazir Viktor Orbanın hakimiyyət sistemindən məsafə saxlamağa başlayıb.
Poliqon xəbər verir ki, bu barədə Financial Times məlumat yayıb. Bildirilir ki, bəzi iri biznes ailələri ölkəni tərk edir və aktivlərini mümkün risklərdən qorumağa çalışır, digərləri isə gələcək baş nazirlə əməkdaşlığa hazır olduqlarını bildirirlər.
2024-cü ildə Orban hakimiyyətinə qarşı çıxan və əvvəllər sistem daxilində olmuş Peter Madyar korrupsiyada ittiham edilən məmurlar və şirkət rəhbərləri ilə məşğul olacağını vəd edib. Onun sözlərinə görə, söhbət Orban tərəfdarlarını mükafatlandırmaq üçün yaradıldığı iddia edilən “milli əməkdaşlıq sistemi” çərçivəsində varlanan şəxslərdən gedir.
Madyar bazar günü bildirib ki, “bir neçə oliqarx ailəsi artıq ölkəni tərk edib”. O, bu kontekstdə Orbanın kürəkənini və onun ən yaxın iqtisadi müşavirlərindən birinin oğlunu xatırladıb.
Onun sözlərinə görə, digər nüfuzlu oliqarx ailələri də artıq övladlarını məktəblərdən çıxarıb və ölkədən getmək üçün etibarlı mühafizə tədbirləri təşkil edirlər.
Madyar həmçinin bildirib ki, Orbanın təbliğat və xüsusi xidmətlər üzrə əsas naziri Antal Roqana yaxın şəxslərin xaricə iri maliyyə köçürmələri etməsi barədə “dəqiq məlumatlara” malikdir.
Bundan başqa, Madyar Orbanın uşaqlıq dostu və Macarıstanın ən varlı şəxsi Lörints Mesarosun ailəsi ilə birlikdə yaxın günlərdə Dubaya uçmağı planlaşdırdığını iddia edib. Yerli medianın məlumatına görə, Mesaros korporativ hesablardan şəxsi hesablara vəsait köçürməyə başlayıb və bu səbəbdən onun bəzi strukturları likvidlik çatışmazlığı ilə üzləşib.
Poliqon.info
