ABŞ Müdafiə Nazirliyi (Pentaqon) İranla müharibənin indiyə qədər 25 milyard dollara başa gəldiyini bildirsə də, ekspertlər real rəqəmin daha yüksək olduğunu bildirirlər. Digər tərəfdən, Hörmüz boğazının blokadası ilə Tehranı geri çəkilməyə məcbur edən Vaşinqton, bölgədə gəmiçilik trafikini normallaşdırmaq üçün alternativ koalisiya qurmağa çalışır.
Hafta.az yazır ki, Pentaqon rəsmisi Cules Hurst dünən ABŞ Nümayəndələr Palatasının Silahlı Qüvvələr Komitəsində İran müharibəsinə indiyə qədər təxminən 25 milyard dollar xərcləndiyini bildirib. Hurst bu məbləğin böyük hissəsinin sursata getdiyini deyib.
ABŞ müdafiə naziri Pit Heqset rəqəmin zədələnmiş ABŞ bazalarının təmiri kimi xərclərin daxil olub-olmadığı barədə şərh verməkdən imtina edib.
Anonimlik şərti ilə CNN-ə danışan Amerika rəsmilərinin sözlərinə görə, Yaxın Şərqdəki zədələnmiş ABŞ hərbi obyektlərinin təmiri və hərbi texnikanın dəyişdirilməsi də nəzərə alındıqda, real xərc 40-50 milyard dollar arasında dəyişir.
28 fevralda ABŞ-İsrail hücumları ilə başlayan müharibə, İranın Ali Lideri Əli Xamenei və İnqilab Keşikçiləri üzvləri də daxil olmaqla bir çox yüksək rütbəli hərbi məmurun ölümünə səbəb olub.
İran İsraildən və ABŞ-ın Körfəz ölkələrindəki müttəfiqlərindən qisas almaq məqəsədilə Bəhreyn, Küveyt, İraq, Birləşmiş Ərəb Əmirlikləri (BƏƏ), Səudiyyə Ərəbistanı və Qətərdəki ABŞ hərbi bazalarını hədəf alıb.
Cavab hücumları ABŞ hərbi raket batareyalarına qoşulmuş radar sistemlərinə zərər verib. Bundan əlavə, ABŞ Hərbi Hava Qüvvələrinə məxsus E-3 Sentry təyyarəsi Səudiyyə Ərəbistanındakı ABŞ bazasına edilən hücumda məhv edilib.
Komitə üzvü olan Demokrat Nümayəndə Ro Xanna 25 milyard dollarlıq rəqəmin real olmadığını bildirib. Pentaqon rəsmiləri əvvəllər Konqresə yalnız müharibənin ilk altı günündə təxminən 11 milyard dollar xərcləndiyini bildirmişdilər.
Bu arada, ABŞ ilə İran arasındakı mübahisə səbəbindən Hörmüz boğazındakı qeyri-müəyyənlik hər gün artmaqda davam edir.
"Wall Street Journal"ın məlumatına görə, ABŞ Dövlət Departamenti xarici nümayəndəliklərə gəmilərin regiondan keçməsini asanlaşdırmaq üçün yeni beynəlxalq koalisiyanın yaradılmasını tələb edən notalar göndərib.
Koalisiya məlumat paylaşacaq, diplomatik koordinasiya təmin edəcək və potensial sanksiyaları tətbiq edəcək. Bu, Birləşmiş Krallıq və Fransa tərəfindən təklif edilən birgə dəniz missiyasını tamamlayacaq.
CNN-in təhlili göstərir ki, Tramp blokadanı uzatmaqla Tehranı çəkindirməyə çalışır. Lakin, neft qiymətlərinin artması və inflyasiya riskinin noyabr ayında keçiriləcək ABŞ-ın ara seçkilərindən əvvəl Trampın əlini zəiflədə biləcəyi qeyd olunur.
Ekspertlər həmçinin iqtisadi vəziyyətin pisləşməsinin İranda rejim əleyhinə etirazlara səbəb ola biləcəyini, lakin bu şərtlərin yetkinləşməsinin uzun müddət çəkəcəyini bildirirlər.
Bəzi analitiklər vurğulayırlar ki, Əli Xameneinin sui-qəsdinə baxmayaraq geri çəkilməyən və onilliklərdir Qərb sanksiyaları altında yaşayan İran yalnız iqtisadi böhran səbəbindən təslim olmayacaq.
