Bu il Rusiyada keçiriləcək 9 may paradının televiziya yayımı əvvəlki illərlə müqayisədə daha qısa olacaq.
Musavat.com xəbər verir ki, “Novaya Gazeta Europe” nəşrinin diqqət çəkdiyi teleproqramlara əsasən, paradın yayımı təxminən 50 dəqiqə davam edəcək.
Məlumata görə, yayım saat 10:00-da başlayacaq və 10:50-də xəbər buraxılışı planlaşdırılıb. Eyni müddət “Rossiya 1”, NTV və “Zvezda” kanallarının efir cədvəllərində də göstərilib.
Son illərlə müqayisədə bu, daha qısa vaxtdır. Belə ki, 2024–2025-ci illərdə yayım təxminən 1 saat 10 dəqiqədən çox davam edib, 2022-ci ildə isə bir saata yaxın olub. 2023-cü ildə də paradın yayımı nisbətən qısa - təxminən 47 dəqiqə təşkil etmişdi.
Daha əvvəlki illərdə isə paradın televiziya yayımı adətən 1 saat 10 dəqiqəni keçmirdi, yalnız 2020 və 2021-ci illərdə bu müddət daha uzun olub.
Musavat.com
