Akademik İbrahim Cəfərov
Azərbaycan Prezidenti İlham Əliyev Avropa çempionatında komanda hesabında çempion olan milli güləşçilərlə görüşündə ölkə idmanının uğurlarını yüksək qiymətləndirərək bu qələbəni “tarixi nailiyyət” kimi səciyyələndirdi. Dövlət başçısı çıxışında vurğuladı ki, Tiranada keçirilən yarışda əldə edilən birincilik təkcə idman uğuru deyil, həm də Azərbaycanın beynəlxalq nüfuzunun göstəricisidir.
Prezident qeyd etdi ki, müasir dövrdə güləş üzrə rəqabət xeyli güclənib, müxtəlif ölkələrdən tanınmış idmançılar yüksək nəticələr göstərir. Belə bir şəraitdə Azərbaycan yığmasının komanda hesabında birinci olması xüsusi əhəmiyyət daşıyır. Onun sözlərinə görə, milli komanda üzvləri öz peşəkarlıqları və iradələri ilə rəqiblərini ədalətli mübarizədə məğlub edərək Avropada lider olduqlarını bir daha sübut etdilər.
Dövlət başçısı Azərbaycan güləşinin zəngin ənənələrə malik olduğunu xatırladaraq bildirdi ki, bu ənənələr uğurla davam etdirilir. O, həm təcrübəli idmançıların, həm də gənc nəslin uğurlarını xüsusi qeyd edərək bunun düzgün qurulmuş məşq və seleksiya sisteminin nəticəsi olduğunu vurğuladı. Prezident federasiya rəhbərliyini, məşqçiləri və idmançıları bu nailiyyət münasibətilə təbrik etdi.
Çıxışda idmanın cəmiyyət üçün əhəmiyyətinə də toxunan İlham Əliyev qeyd etdi ki, qələbələr xalqda böyük qürur hissi yaradır və gənc nəslin vətənpərvərlik ruhunda formalaşmasında mühüm rol oynayır. Onun sözlərinə görə, Azərbaycanın idman sahəsində qazandığı uğurlar ölkənin ümumi inkişafının göstəricisidir.
Prezident həmçinin vurğuladı ki, ölkədə idman infrastrukturu geniş şəkildə inkişaf etdirilib, regionlarda Olimpiya idman kompleksləri və güləş zalları fəaliyyət göstərir. Bu imkanlar gələcəkdə yeni çempionların yetişməsi üçün möhkəm zəmin yaradır.
Xüsusi olaraq qeyd edildi ki, Avropa çempionatında həm sərbəst, həm də yunan-Roma güləşi üzrə komandaların birinci olması böyük nailiyyətdir. Qadın güləşçilərin də medal qazanması müsbət hal kimi dəyərləndirildi və gələcəkdə onların daha böyük uğurlar əldə edəcəyinə inam ifadə olundu.
Prezident çıxışında idmançıların yalnız yarış meydanında deyil, cəmiyyətdə də nümunəvi davranış sərgiləməsinin vacibliyini önə çəkdi. O bildirdi ki, Azərbaycan idmançıları həm qələbədə, həm də çətin məqamlarda ləyaqətli davranış nümayiş etdirməlidirlər. Bu xüsusiyyət onların beynəlxalq arenada ölkəni layiqincə təmsil etməsinin əsas şərtlərindən biridir.
Sonda İlham Əliyev əminliyini ifadə etdi ki, Azərbaycan idmanı bundan sonra da inkişaf edəcək, yeni nəsil idmançılar ölkəyə yeni qələbələr qazandıracaq və xalqımızı sevindirməyə davam edəcək.
