Polşa hüquq-mühafizə orqanları Ukraynadan qanunsuz silah qaçaqmalçılığına qarşı mübarizə aparmaq üçün "Trident" kod adlı bir plan hazırlayıblar. Bu barədə Polşa Polisinin Mərkəzi İstintaq Bürosunun Mütəşəkkil Cinayətkarlıqla Mübarizə İdarəsinin rəisi Adam Radon bildirib.
Onun sözlərinə görə, Ukrayna "Sovet dövründən qalma xeyli miqdarda silahla yanaşı, yardım paketlərinin bir hissəsi kimi çoxlu sayda silahın daşındığı yerdir". O qeyd edib ki, silahlı münaqişələrin sonu həmişə nəzarətsiz silah axını riskini daşıyır.
Radon "Rzeczpospolita" qəzetinə verdiyi müsahibədə bildirib ki, "Trident Layihəsi polis əməkdaşlarına bu cür qaçaqmalçılığı aşkar etmək və bu fəaliyyətlə məşğul olan mütəşəkkil cinayətkar qrupları dağıtmaq üçün təlim keçmək üçün nəzərdə tutulub".
Planın həyata keçirilməsi üçün 6,6 milyon zloti (1,8 milyon dollar) ayrılacaq. Bu vəsait qaçaqmalçılığın aşkarlanması üçün ixtisaslaşdırılmış avadanlıqların alınmasına, eləcə də Çexiya, Litva, Moldova, İspaniya və Ukraynanın özünün sərhəd xidmətləri və səlahiyyətli orqanları ilə qarşılıqlı əlaqənin təşkilinə sərf olunacaq.
Əziz MUSTAFA
