Polşanın baş naziri Donald Tusk NATO və Avropa İttifaqı daxilində birliyin qorunmasının vacibliyini vurğulayaraq, alyans daxilində mümkün daxili qarşıdurmalardan çəkinməyə çağırıb. O bildirib ki, hazırkı geosiyasi şəraitdə həm müttəfiqlər arasında, həm də dövlət institutları daxilində uzlaşma və koordinasiya xüsusi əhəmiyyət kəsb edir.
“İki sahil” xəbər verir ki, bu barədə RT məlumat yayıb.
Baş nazirin sözlərinə görə, davamlı birlik yalnız cəmiyyət daxilində həmrəyliyin təmin olunması və hüquqi normalara ciddi riayət edilməsi ilə mümkündür. O qeyd edib ki, Polşa üçün əsas prioritetlər sırasında NATO çərçivəsində təhlükəsizlik, ABŞ ilə möhkəm transatlantik əlaqələr və Avropa inteqrasiyası dayanır. Tusk əlavə edib ki, qarşıdakı sammitdə tərəfdaş ölkələrə birliyin və həmrəyliyin əhəmiyyətini bir daha xatırlatmağı planlaşdırır.
Donald Tusk eyni zamanda son dövrlərdə NATO-nun əhəmiyyəti ilə bağlı şübhələrin artdığını və Avropa İttifaqını zəiflətməyə yönəlmiş müəyyən meyillərin müşahidə olunduğunu diqqətə çatdırıb. Onun fikrincə, ortaq siyasi dəyərlərə əsaslanan Qərb birliyinin qorunması və gücləndirilməsi xüsusi əhəmiyyət daşıyır.
Baş nazir vurğulayıb ki, Varşava inteqrasiya olunmuş Avropanın və ABŞ, Kanada ilə yanaşı Avropa ölkələrinin də iştirak etdiyi sıx hərbi əməkdaşlığa əsaslanan güclü NATO-nun tərəfdarıdır. O, həmçinin bildirib ki, Polşa ABŞ qoşunlarının Almaniyadan NATO-nun şərq cinahına köçürülməsi ilə bağlı hələlik heç bir rəsmi siqnal almayıb.
Bu açıqlamalar fonunda Tusk bir daha qeyd edib ki, mövcud çağırışlar şəraitində Qərb ölkələrinin parçalanması deyil, əksinə daha sıx əməkdaşlıq və qarşılıqlı etimada əsaslanan birlik nümayiş etdirməsi vacibdir.
