ain.az, Redaktor.az portalına istinadən məlumat yayır.
ABŞ dövlət katibi və prezidentin milli təhlükəsizlik üzrə müşaviri Marko Rubio bildirib ki, ABŞ-nin Hörmüz boğazındakı əməliyyatı hücum deyil, müdafiə xarakteri daşıyır.
Redaktor.az xəbər verir ki, bu barədə o, Ağ Evdə jurnalistlər üçün keçirdiyi brifinqdə danışıb.
"Bu, müdafiə əməliyyatıdır. Məqsədi çox sadədir: bizə atəş açılmayana qədər biz atəş açmırıq. Biz hücum etmirik. Amma bizə hücum edilərsə, gəmilərə zərbə endirilərsə, buna cavab verilməlidir", - deyə Rubio bildirib.
O, beynəlxalq hüquqa istinad edərək qeyd edib ki, heç bir ölkənin beynəlxalq sularda nəzarət qurmaq hüququ yoxdur və İranın məhz buna iddia etdiyini vurğulayıb.
"Əgər İrana elektrik stansiyaları üçün mülki nüvə proqramı lazımdırsa, dünyada belə proqramlara malik, lakin uranı zənginləşdirməyən, onu idxal edən ölkələr çoxdur. Onlar isə elə davranırlar ki, sanki hərbi nüvə proqramı istəyirlər. Bu qəbuledilməzdir", - deyə o qeyd edib.
ABŞ-nin İranla zənginləşdirilmiş uranın gələcək taleyi məsələsini də müzakirə etmək niyyətində olduğu bildirilib.
Bundan əlavə, Rubio ABŞ-nin gələcəkdə Kuba məsələsi ilə də məşğul olacağını qeyd edib. Onun sözlərinə görə, ölkənin iqtisadi modeli işləmir və hakimiyyət bunu düzəldə bilmir.
"Bizim sahillərimizdən 90 mil (təxminən 140 km) məsafədə uğursuz dövlət yerləşir və o, bəzi rəqiblərimiz üçün dost əraziyə çevrilib. Bu vəziyyət qəbuledilməzdir və biz bununla məşğul olacağıq, amma bu gün yox", - deyə Rubio vurğulayıb.
Sonrakı hadisələr barədə daha çox məlumat almaq üçün ain.az saytını izləyin.
