Bu gün Müqəddəs Üçlük Katedralında Pravoslav Kilsəsinin genişləndirilmiş məclisində Gürcüstanın 142-ci patriarxı seçiləcək. Gürcüstanın 24News.ge portalı xəbər verir ki, Sinodun qərarına əsasən, patriarxlığa üç namizəd irəli sürülüb: patriarx taxtının müvəqqəti rəhbəri, Senaki və Çxorotsku mitropoliti Şio (Muciri), Urbnisi və Ruisi yeparxiyasının mitropoliti İob, həmçinin Poti və Xobi mitropoliti Qriqoli. Yeni patriarxın seçiləcəyi genişləndirilmiş kilsə məclisində təxminən 1200 nümayəndənin iştirakı gözlənilir. Patriarxlığın məlumatına görə, Üçlük Katedralında keçiriləcək toplantıya iştirak yalnız xüsusi siyahılar əsasında mümkün olacaq. Məbədə giriş saat 10:00-dan etibarən başlayacaq. Patriarx seçkiləri günü məbədin həyətində isə istənilən şəxs iştirak edə biləcək, məhdudiyyət yalnız məbədin daxilinə aiddir. Toplantıda patriarxlığa namizədlər çıxış edəcək, həmçinin onların yeparxiyalarından bir nümayəndə söz alacaq. Namizədlər üçün çıxış müddəti 5 dəqiqə, nümayəndələr üçün isə 3 dəqiqə müəyyən edilib. Patriarxlıq bildirib ki, tədbir televiziya vasitəsilə qismən yayımlanacaq. İclasın bir hissəsi qapalı keçiriləcək – canlı yayımda yalnız qapıların açılması, səsvermə prosesi və yekun nəticələrin elan olunması göstəriləcək. Səslərin sayılması isə qapalı olacaq. Seçki bülletenlərində üç namizədin adı yer alacaq. Seçicilər seçim etdikdən sonra bülleteni zərfə qoyaraq mərkəzdə yerləşdirilən seçki qutusuna atacaqlar. Kilsənin idarəetmə nizamnaməsinə əsasən, patriarxın ilk turda seçilməsi üçün səslərin 50 faiz + 1-ni toplamaq tələb olunur. Əgər namizədlərdən biri tələb olunan səsi qazanarsa, ikinci tura ehtiyac olmayacaq. Əks halda, ən çox səs toplamış iki namizəd arasında ikinci tur keçiriləcək. Nəticəni həmin gün yüksək rütbəli yepiskop, mitropolit Anania Japaridze elan edəcək. Eyni zamanda, yeni patriarxın intronizasiya tarixi ilə bağlı qərarın da açıqlanacağı gözlənilir. Xatırladaq ki, bütün Gürcüstanın katolikos-patriarxı Ilia II 2026-cı il martın 17-də 93 yaşında vəfat edib. Bundan sonra Gürcü Pravoslav Kilsəsinin yeni rəhbərinin seçilməsi məsələsi gündəmə gəlib.

• Gürcüstan
• Namizəd
• Patriarx
• Pravoslav Kilsəsi
• Müqəddəs Üçlük Katedrali