Səhər yeməklərinizi həm dadlı, həm də çox faydalı bir reseptlə rəngləndirmək istəyirsinizsə, avokado əzməsi ən yaxşı seçimdir.
Pravda.az bildirir ki, vitamin və sağlam yağlarla zəngin olan bu ləzzətli sousu hazırlamaq cəmi 5 dəqiqənizi alacaq.
Lazım olan məhsullar:
Avokado: 1 ədəd (yaxşı yetişmiş və yumşaq)
Limon suyu: Yarım limonun suyu
Sarımsaq: 1-2 diş (zövqə görə)
Zeytun yağı: 2 xörək qaşığı
Duz və istiot: Zövqə görə
Qırmızı pul bibər: (Acı sevənlər üçün)
Cəfəri və ya keşniş: (İncə doğranmış)
Hazırlanma qaydası:
Avokadonun təmizlənməsi: Avokadonu tən ortadan bölün və çəyirdəyini çıxarın. Bir qaşıq vasitəsilə meyvənin içini qabığından ayırıb dərin bir qaba qoyun.
Əzmə prosesi: Avokadoları çəngəl vasitəsilə tam püre halına gələnə qədər yaxşıca əzin.
Dadlandırılması: Əzilmiş avokadonun üzərinə əzilmiş sarımsağı, limon suyunu, zeytun yağını, duzu və ədviyyatları əlavə edin. Limon suyu həm dad verir, həm də avokadonun qaralmasının qarşısını alır.
Qarışdırılması: Son olaraq incə doğranmış göyərtiləri əlavə edib bütün inqrediyentləri yaxşıca qarışdırın.
Qeyd: Hazırladığınız avokado əzməsini qızardılmış çörək dilimlərinin üzərinə çəkərək, üzərinə qayğanaq və ya ağ pendir əlavə edərək servis edə bilərsiniz.
Əminə Bayramova
