Türkiyə Xarici İşlər Nazirliyinin sözçüsü Oncu Keçeli bildirib ki, Ankara və İrəvan iki ölkə arasında birbaşa ticarətin başlanması üçün hazırlıqları başa çatdırıb. Diplomat X sosial media hesabında yazıb: "2022-ci ildən bəri davam edən Ermənistanla normallaşma prosesi kontekstində qəbul edilən etimad quruculuğu tədbirlərinin bir hissəsi olaraq, ölkəmizlə Ermənistan arasında birbaşa ticarətin başlanması üçün bürokratik hazırlıqlar 11 may 2026-cı il tarixinə qədər başa çatıb".
Onun sözlərinə görə, yeni qaydalara əsasən, Türkiyədən üçüncü ölkə üzərindən Ermənistana göndərilən və ya eyni marşrutla Ermənistandan Türkiyəyə daşınan malların sənədlərində son təyinat və ya çıxış məntəqəsinin “Ermənistan-Türkiyə” kimi göstərilməsi artıq mümkün olacaq. Keçeli həmçinin Türkiyə-Ermənistan quru sərhədinin açılması istiqamətində texniki və bürokratik hazırlıqların davam etdiyini vurğulayıb. Türkiyənin regionda sülh və əməkdaşlıq siyasətinə diqqət çəkən XİN rəsmisi bildirib: “Cənubi Qafqazda davamlı sülh və rifahın möhkəmləndirilməsi istiqamətində yaranmış tarixi imkan fonunda Türkiyə bölgədə iqtisadi münasibətlərin inkişafına və əməkdaşlığın bütün region ölkələri və xalqlarının mənafeyi naminə daha da irəli aparılmasına töhfə verməyə davam edəcək”.
Qeyd olunur ki, iki ölkə arasında ortaq sərhədin açılması üçün lazımi texniki və bürokratik işlər davam edir. Türkiyəli diplomat açıqlamasında bildirib ki, Cənubi Qafqazda davamlı sülh və rifahın möhkəmləndirilməsi üçün tarixi fürsəti nəzərə alaraq, Türkiyə regiondakı bütün ölkələrin və xalqların rifahı naminə iqtisadi əlaqələrin inkişafına və əməkdaşlığın daha da inkişaf etdirilməsinə töhfə verməyə davam edəcək. Qeyd etmək lazımdır ki, bir müddət əvvəl "Mülki Müqavilə" üzvləri ilə Şenqavit seçiciləri arasında keçirilən görüşdə Ararat Mirzoyan Nikol Paşinyanın qulağına nəsə pıçıldamışdı. Mikrofonların bağlı olmasına baxmayaraq, media nazirin açılış cümləsini yadda saxladı: "Türklər bu gün açılış edirlər. Biz xoş gəlmisiniz mesajı, Xarici İşlər Nazirliyinin mətbuat katibinin şərhini edəcəyik". Mirzoyan jurnalistlərlə söhbətində açıqlamasını dəqiqləşdirməyib, lakin Paşinyan özü bildirib ki, bundan sonra Türkiyədən mal idxal edərkən Ermənistan idxalçı ölkə kimi göstəriləcək. Paşinyanın sözlərinə görə, Türkiyə qanunvericiliyi əvvəllər Ermənistanın idxalçı ölkə kimi qeyd olunmasına icazə vermirdi. Başqa sözlə, Ermənistana göndərilən mallar üçüncü ölkələrdə rəsmiləşdirilir və sonra buraya çatdırılırdı. Hazırda Türkiyə qanunvericiliyində dəyişiklik edilir və bu dəyişikliklə Ermənistan Türkiyə məhsullarını idxal edən ölkələrin siyahısına əlavə olunacaq.
Tahir TAĞIYEV
