“Levada Mərkəzi”nin sorğusu ölkədə sosial-iqtisadi narahatlıqların tədricən gücləndiyini göstərir...
Poliqon xəbər verir ki, bu barədə “Levada Mərkəzi” məlumat yayıb. Rusiyada keçirilən ictimai rəy sorğusunun nəticələrinə əsasən, respondentlərin 20 faizi həyat səviyyəsinin aşağı düşməsi fonunda ölkədə kütləvi etiraz aksiyalarının baş verə biləcəyini hesab edir. Sorğuda iştirak edənlərin 16 faizi isə belə aksiyalar təşkil olunacağı təqdirdə şəxsən iştirak etməyə hazır olduqlarını bildirib.
Araşdırmada siyasi motivli etirazlarla bağlı göstəricilər də yer alıb. Respondentlərin 14 faizi Rusiyada siyasi etirazların mümkün olduğunu düşündüyünü qeyd edib. Eyni zamanda, iştirakçıların 12 faizi belə aksiyalarda iştirak etməyə hazır olduğunu açıqlayıb.
“Levada Mərkəzi”nin qiymətləndirməsinə görə, ölkədə ümumi etiraz potensialı hələ də aşağı səviyyədə qalır. Bununla belə, son bir il yarım ərzində etiraz əhval-ruhiyyəsində tədrici artım müşahidə olunur. Mərkəz hesab edir ki, sosial-iqtisadi problemlər, əhalinin gəlirlərində azalma və gündəlik həyat xərclərinin yüksəlməsi cəmiyyətdə narazılığın artmasına təsir göstərən əsas amillər sırasındadır.
Ekspertlər bildirirlər ki, Rusiyada ictimai fəallığın aşağı qalmasına baxmayaraq, iqtisadi vəziyyətlə bağlı narahatlıqların dərinləşməsi gələcəkdə etiraz meyllərinin daha da güclənməsinə səbəb ola bilər. Xüsusilə regionlarda sosial təminat, əməkhaqqı və yaşayış xərcləri ilə bağlı problemlərin ictimai narazılığı artırdığı vurğulanır.
Poliqon.info
