Krivotsyuk “Seul”a qarşı 90 dəqiqə oynadı, yenə üzüldü

Futbol üzrə Azərbaycan millisinin müdafiəçisi Anton Krivotsyuk Cənubi Koreyanın “Daejeon Hana Sitizen” komandasında növbəti matçına çıxıb.

Arena.az xəbər verir ki, futbolçumuzun komandası ölkə çempionatının (K Liqa 1) 2026-cı il mövsümünün 15-ci turu çərçivəsində “Seul”la qarşılaşıb.

“Daejeon Hana Sitizen” bu rəqiblə doğma meydanda üz-üzə gəlib. Krivotsyukun komandası qarşılaşmadan 1:2 hesablı məğlubiyyətlə ayrılıb.

Anton bu oyuna start heyətdə başlayıb və sonadək mübarizə aparıb. O, 85-ci dəqiqədə sarı vərəqə də alıb.

Ardıcıl 3 turdur uduzan “Daejeon Hana Sitizen” cari mövsümdə keçirdiyi 15 oyuna topladığı 16 xalla 12 iştirakçı arasında 9-cu pillədə qərarlaşıb. Krivotsyukun komandası 15 oyuna 4 qələbə qazanıb, 4 heç-heçə edib, 7 məğlubiyyətə üzülüb. Anton bu görüşlərin 9-da iştirak edib.

Xatırladaq ki, Anton Krivotsyuk Cənubi Koreya klubuna 2023-cü ilin fevral ayında Polşanın “Visla” (Plotsk) komandasından 600 min avro qarşılığında transfer olunub. O, bu komandanın heyətində 102 oyuna çıxıb, 5 qol, 3 məhsuldar ötürmə müəllifi olub. 27 yaşlı müdafiəçinin Cənubi Koreya klubu ilə 2027-ci il dekabrın 31-nə qədər nəzərdə tutulmuş müqaviləsi mövcuddur.

Anton daha öncə Azərbaycanda “Neftçi”nin uğurları üçün çalışıb. Mərkəz müdafiəçisi Azərbaycan yığma komandasında da 46 matça çıxıb, 1 qola imza atıb.