Bu gün Ukrayna və ölkəmiz üçün tarixi bir andır. Biz ilk dəfə Beynəlxalq Şəhərsalma Forumunda ölkəmizi təqdim edirik. Bu, Ukraynanın milli pavilyonudur və gələcək evlərimizin bərpasını təmsil edir.
APA xəbər verir ki, bunu Ukrayna Baş nazirinin müavini, icmalar və ərazilərin inkişafı üzrə nazir Oleksiy Kuleba WUF13 çərçivəsində “Urban Expo” sərgisində Ukrayna pavilyonunda jurnalistlərə açıqlamasında deyib.
O, forumun təşkilatçılarına, xüsusilə Azərbaycan Respublikasına təşəkkür edib.
“Müharibə davam etdiyi müddətdə bizim prinsipimiz budur: biz həm bərpanı davam etdiririk, həm də bunu genişmiqyaslı işğaldan əvvəlkindən daha yaxşı şəkildə həyata keçiririk”, - Kuleba bildirib.
Baş nazirin müavini qeyd edib ki, hazırda Ukraynada yeraltında fəaliyyət göstərən 20-dən çox məktəb var: “Bu, bizim yeni reallığımızdır və biz bunu sizinlə bölüşmək istəyirik. Təəssüf ki, bu çox pis bir təcrübədir, amma biz bunu Rusiyanın təcavüzü səbəbindən yaşayırıq. İstəyirik ki, siz bu şəraiti biləsiniz və faciəmiz haqqında eşidəsiniz. Bir daha qeyd etmək istəyirəm ki, bu bizim üçün yalnız faciə deyil. Bu, həm də bərpa və xalqımızın dözümlülüyü üçün bir fürsətdir”.
Oleksiy Kuleba Ukraynanın Azərbaycanla çox səmərəli əməkdaşlığının olduğunu vurğulayıb: “Burada bizimlə birlikdə İrpen şəhərinin nümayəndəsi Anjela Makeeva da iştirak edir. O, İrpen şəhər administrasiyasının katibidir. Azərbaycan Ukraynada bəzi obyektlərin yenidən qurulmasına kömək edir və əlbəttə ki, bizim üçün burada olmaq və hökumətlərlə belə söhbətlər aparmaq çox rəmzi əhəmiyyət daşıyır”.
