Qazaxıstan, Azərbaycan, Türkiyə və Qırğızıstan arasında beynəlxalq avtodaşımalara dair icazə blanklarının elektron formatda mübadiləsinə start verilib.
Moderator.az xəbər verir ki, bu barədə Qazaxıstanın Nəqliyyat Nazirliyi tərəfindən rəsmi açıqlama verilib.
Rəqəmsal formata yönəlmək kağız daşıyıcılarından imtina etməyə və bürokratik əngəlləri ən aşağı səviyyəyə salmağa imkan verəcək. Artıq buraxılış sənədləri ölkələrin birgə fəaliyyət göstərən informasiya şəbəkələri üzərindən rəqəmsal qaydada rəsmiləşdirilir və tətbiq edilir.
Təqdim olunan elektron icazələrlə bağlı bütün detallar, o cümlədən daşıyıcı şirkət və nəqliyyat vasitəsinin rekvizitləri (dövlət qeydiyyat nişanı) birbaşa olaraq Qazaxıstan, Azərbaycan, Türkiyə və Qırğızıstanın müvafiq məlumat bazalarına göndərilir.
Məhz buna görə də qeyri-qanuni rəsmiləşdirilmiş (həmçinin kənar şəxslərdən alınmış) icazələrdən istifadə zamanı sistemdə məlumat fərqliliyi üzə çıxacaq. Bu hal adları çəkilən dövlətlərin sərhədini keçməklə bağlı qadağaya, eləcə də digər növ cərimələrin tətbiqinə gətirib çıxara bilər.
