ABŞ Mərkəzi Komandanlığı (CENTCOM) Oman körfəzində İrana doğru hərəkət edən bir gəminin sıradan çıxarıldığını təsdiqləyib.
Publika.az xəbər verir ki, bu barədə CENTCOM-un mətbuat xidməti məlumat yayıb.
Bildirilib ki, aprelin 13-də ABŞ tərəfindən İrana tətbiq edilən blokadanı yarmağa cəhd edən Qambiya bayrağı altında üzən "Lian Star" quru yük gəmisi "Hellfire" raketi ilə vurularaq sıradan çıxarılıb. Bu, məhdudiyyətlər tətbiq olunandan bəri güc tətbiq edilərək dayandırılan altıncı gəmidir. Heyətin vəziyyəti barədə hələlik məlumat verilmir.
Hadisədən əvvəl ABŞ Prezidenti Donald Tramp "Truth Social" sosial şəbəkəsində bildirib ki, Vaşinqton Tehrana atom proqramı və Hörmüz boğazının açılması ilə bağlı məsələləri razılaşdırmayıb. ABŞ lideri vurğulayıb ki, İslam Respublikasının nüvə silahı olmamalıdır və Hörmüz boğazı dərhal açılmalıdır.
