Bizi Telegram-da da izləyə bilərsiniz:@xqazeti
"Honda" şirkəti şaquli uçuş və eniş qabiliyyətinə malik şəxsi elektrikli təyyarəsinin (eVTOL) işlənib hazırlanmasında mühüm uğura imza atıb. Şirkətin yaydığı rəsmi məlumata görə, texnologiyanın tamölçülü nümayişçisi ilk sınaq uçuşunu uğurla başa vurub. Sınaqlar ABŞ-nin Kaliforniya ştatındakı San-Luis-Obispo poliqonunda reallaşıb. Təxminən 3,2 ton çəkisi olan aparat havada təqribən bir dəqiqə yarım qalıb. Uçuş müddətinin qısa olmasına baxmayaraq, yerdən ilk uğurlu ayrılma yeni aviasiya platformalarının yaradılmasında ən mühüm mərhələlərdən biri hesab olunur.
"Honda eVTOL" layihəsinin hazırlanması 2020-ci ildən bəri davam edir. Şirkət mütəxəssisləri tamölçülü nümunəni ərsəyə gətirməzdən əvvəl əsas texniki həlləri sınaqdan keçirmək üçün kiçildilmiş modellər üzərində 400-dən çox sınaq uçuşu aparıblar. Proqramın növbəti mərhələsi əsas sistemlərin artıq real miqyaslı aparat üzərində yoxlanılmasını nəzərdə tutur. Mühəndislər bu perspektivli hava nəqliyyatının aerodinamik xüsusiyyətlərinin, idarəetmə sistemlərinin, güc qurğusunun və ümumi konstruksiyasının səmərəliliyini təsdiq etməlidirlər.
"Honda" özünün "eVTOL" proqramı barədə ətraflı məlumatı ilk dəfə 2023-cü ildə keçirilən "Dubai Airshow" aviasalonunda açıqlayıb. Bu layihə şirkətin yeni nəsil hava mobilliyi bazarına daxil olmaq üzrə uzunmüddətli strategiyasının bir hissəsidir. Ekspertlər bu sahəni yaxın illərdə aviasiya sənayesinin ən perspektivli inkişaf istiqamətlərindən biri kimi qiymətləndirirlər.
Ə.Arzu
XQ
