BYD-nin satışları 2026-cı ilin may ayında xarici tələbin təsiri ilə 9 aydan sonra ilk dəfə artıb.
Marja xəbər verir ki, Mərkəzi ofisi Çinin Şençjen şəhərində yerləşən avtomobil istehsalçısının bazar ertəsi açıqladığı məlumata görə, şirkət ötən ay 383 min 453 avtomobil təhvil verib. Bu isə əvvəlki ilin eyni dövrü ilə müqayisədə 0,3 faizlik artım deməkdir. Avtomobillərin 160 min 644-ü xarici bazarlarda satılıb. Bu vəziyyət daxili bazarda tələbin azalması fonunda BYD-nin qlobal miqyasda böyüdüyünü göstərir.
BYD May ayında 376 990 ədəd minik avtomobili satıb. BYD-nin sərnişin nəqliyyat vasitələrinin satışlarında ardıcıl 8 ay baş vermiş azalma dayanıb. May ayında şirkətin satışları ötən ilin may ayı ilə müqayisədə 60 ədəd artıb.
BYD qrupu 2026-cı ilin yanvar-may dövründə cəmi 1 milyon 405 min 39 ədəd avtomobil satıb.
Şirkət bu il Çin xaricində 1,3 milyon avtomobil satmağı hədəfləyir. Bu da 2025-ci illə müqayisədə təxminən 25 faiz çoxdur.
Bu rəqəmlər BYD-nin əvvəlki rübdə mənfəətində kəskin azalma açıqlamasından sonra investorların əhval-ruhiyyəsini yüksəltməyə kömək edib. Avtomobil istehsalçısı dövlət subsidiyalarının mərhələli şəkildə ləğv edilməsi və Çindəki rəqib avtomobil istehsalçılarının artan rəqabətilə mübarizə aparmağa davam edir.
Daxili qiymət "müharibəsinin" təzyiqi ilə üzləşən şirkət xaricdə aqressiv şəkildə genişlənir və Avropadakı satışları sürətlə artır. Şirkət regionda zavodları ələ keçirmək üçün Stellantis və digər avropalı avtomobil istehsalçıları ilə danışıqlar aparır.
BYD-nin mənfəəti ilin birinci rübündə illik müqayisədə 55 faiz azalaraq 600 milyon dollara düşüb və 2023-cü ildən bəri ən aşağı səviyyəyə geriləyib.
