“Turan Tovuz” avrokuboklardan kənarlaşdırıldı – Rəsmi – ARENA.AZ

UEFA Azərbaycan təmsilçisi “Turan Tovuz” klubunun avrokubokların 2026/2027-ci illər mövsümündə iştirakına qadağa qoyub.

Arena.az xəbər verir ki, bu barədə Tovuz klubun bəyanatında bildirilib.

Tovuz təmsilçisi bu qərardan İdman Arbitraj Məhkəməsinə (CAS) müraciət edəcək:

“2025/2026-ci illər mövsümündə bütün idman prinsiplərinə əməl edərək mövsümü 3-cü pillədə başa vurduq və haqqımız olan Avropa Konfrans Liqasında çıxış etmək hüququ qazandıq. UEFA İntizam Komitəsi klubumuzun kriteriyalara cavab verib-verməməsinə dair araşdırma aparıb. AFFA İntizam Komitəsinin 13 dekabr 2019-cu il tarixli qərarını (https://www.affa.az/ind…/news/ntizam-komitsinin-qrar/65952) əsas götürən qurum 2 iyun 2026-cı il tarixində klubumuzu 2026/2027-ci illər mövsümündə UEFA-nın idman yarışlarında iştirakdan kənarlaşdırılıb”.

Klubun bəyanatında qeyd olunub ki, AFFA İntizam Komitəsi tərəfindən 2019/2020-ci illər mövsümündə Birinci Divizionda çıxış edən komandanın 7 futbolçusuna futbolla bağlı bütün növ fəaliyyətlərinə qadağa qoyulmuşdu:

“Bildirmək istəyirik ki, klubumuz tərəfindən qərarın dəyişdirilməsi və bütün idman prinsipləri qorunaraq vəsiqə qazandığımız Avropa Konfrans Liqasında iştirakımızın təmin edilməsi üçün bu gündən etibarən bütün hüquqi addımlar atılacaq və İdman Arbitraj Məhkəməsinə (CAS) müraciət olunacaq. Əlavə olaraq bildiririk ki, Avropa Konfrans Liqasına hazırlıq planlarımızda hər hansı dəyişiklik yoxdur. Bu ay komanda üzvləri toplanacaq və Türkiyəyə təlim-məşq toplanışına yollanacaq”.

Qeyd edək ki, 2019-cu ildə Birinci Divizionda çıxış edərkən danışılmış oyunlarla əlaqədar “Turan Tovuz”un 7 futbolçusu – Sənan Qocayev, Misir Rüstəmov, Emin Bağırov, İlkin Sadıqov, Rüfət Məmmədov, Eltay Tağıyev və Şahin Quluzadənin futbolla bağlı bütün növ fəaliyyətlərinə qadağa qoyulub.