London, 12 may, AZƏRTAC
Uels Şahzadəsi Keyt Middlton xərçəngə qarşı müalicə dövründən danışıb.
AZƏRTAC “Reuters”ə istinadla xəbər verir ki, o, xərçənglə mübarizə zamanı təbiətin onun üçün necə bir şəfa mənbəyinə çevrildiyini açıqlayıb və bu mövzuya həsr olunan yeni video layihəyə başlayıb.
Kensinqton Sarayının sosial media kanallarında yayımlanacaq dörd hissəli video seriyası “Təbiətin dörd fəsli” adlanır. Layihə çərçivəsində “Yaz” adlanan ilk video bu gün təqdim olunub. Üç dəqiqəlik video Uels Şahzadəsi tərəfindən səsləndirilib. Video Keyt Middlton və Şahzadə Uilyamın bu ayın əvvəlində Mull adasına səfəri zamanı çəkilən görüntüləri əhatə edir.
Uels Şahzadəsi bildirib ki, son bir ildə təbiət onun üçün bir sığınacaq olub. O vurğulayıb ki, təbiət vasitəsilə hər şeyin bir-biri ilə necə bağlı olduğunu, tarazlığın, yenilənmənin və dözümlülüyün önəmini anlamaq mümkündür.
Aytən Abbaslı
AZƏRTAC-ın xüsusi müxbiri
London
