Finss.az - ABŞ fond bazarlarında əsas indekslər çərşənbə günü artımla bağlanıb.
Səbəb isə prezident Donald Trampın Vyetnamla yeni ticarət razılaşmasının əldə olunduğunu açıqlaması olub. Razılaşmaya əsasən, Vyetnam ABŞ-a ixrac etdiyi məhsullara 20% gömrük rüsumu ödəyəcək, eyni zamanda ABŞ məhsullarına tətbiq edilən tariflər ləğv olunacaq.
Bu razılaşma Vyetnam mallarına tətbiq ediləcəyi gözlənilən 46%-lik tarifdən yayınmağa imkan verir və investorlar tərəfindən müsbət qarşılanıb. Bununla yanaşı, bazarlarda əmək bazarı ilə bağlı statistik göstəricilər də diqqət mərkəzində olub.
ADP-nin məlumatına əsasən, iyun ayında ABŞ-ın özəl sektorunda 33 min iş yeri azalıb ki, bu da son bir il ərzində ilk mənfi nəticədir. Bu nəticə, Federal Ehtiyat Sisteminin (FED) iyul iclasında uçot dərəcəsini azaltmaq ehtimalını artırıb – ehtimal 20%-dən 27%-ə yüksəlib.
Səhmlər üzrə fərdi hərəkətlər də diqqət çəkib. Tesla səhmləri 5% bahalaşıb, Apple 2,2% yüksəlib, Centene isə proqnozların geri çəkilməsi fonunda 40% ucuzlaşıb.
