ain.az, Pravda.az saytından verilən məlumata əsaslanaraq xəbər yayır.
“Azərbaycanda rus dilli məktəblərdə təhsil alanların “5-ci kolon” adlandırılması heç də doğru deyil. Bu gün azərbaycanlı gənc xarici dil biliyi yüksək və milli dəyərlərinə bağlı olaraq yetişdirilir. Unutmayaq ki, bu təhsil müəssisələrində Azərbaycan tarixi və mədəniyyəti tədris olunur. Dövlətimiz gənclərin milli ruhda böyüməsinə xüsusi diqqət göstərir”.
Bu sözləri Pravda.az-a açıqlamasında Milli Məclisin deputatı Müşfiq Cəfərov deyib.
“Hazırda Azərbaycanda rusdilli məktəblərin bağlanacağı ilə bağlı iddia var. Xüsusilə, Azərbaycan və Rusiya arasında baş verən gərginlik fonunda ölkəmizdə rusdilli məktəblərin fəaliyyətinə münasibət yenidən ictimai müzakirələrin əsas mövzusuna çevrilib. Rus dili post-sovet məkanında və beynəlxalq elmi sahədə hələ də əhəmiyyətli mövqeyə malikdir. Bu dili bilmək Azərbaycan gəncləri üçün əlavə imkanlar yarada, onların təhsil, elm və biznes sahəsindəki perspektivlərini genişləndirə bilər. Həmçinin ölkəmizdə fəaliyyət göstərən bir çox rusdilli məktəb və liseylər yüksək təhsil səviyyəsi ilə seçilir. Ölkəmizin elmi və texnoloji potensialına töhfə verən məzunların da yetişdirdiyini unutmayaq. Bu məktəblər təkcə rus dilinə deyil, həm də Azərbaycan dili və ədəbiyyatına önəm verən, şagirdlərini hər iki dildə yetişdirən təhsil müəssisələridir. Düşünürəm ki, belə bir qərar qəbul olunmasında əsas məqsəd Azərbaycan dilinin əsas tədris dili kimi mövqeyini gücləndirmək, milli təhlükəsizlik və milli kimliyin qorunmasından irəli gələn bir addım olacaq. Lakin bunun əvəzinə həmin məktəblərin fəaliyyətinin ciddi dövlət nəzarətinə alınması daha məqsədəuyğun olardı. Hətta son illər rusdilli məktəblərdə tədris proqramlarının Azərbaycanın milli maraqları və dəyərləri ilə uyğunlaşdırılması, dövlət dilinin tədrisdə üstün mövqeyinin qorunması kimi məsələlər xüsusi diqqətdə saxlanılır. Azərbaycan təhsilinin əsas məqsədi milli dəyərlərini, azərbaycançılıq ideologiyasını və dövlət dilini qorumaqla yanaşı, çoxdilli təhsil mühitini idarəedilən, şəffaf və milli maraqlara uyğun şəkildə inkişaf etdirmək olmalıdır”, - deputat bildirib.
Aytəkin Qardaşova
Hadisənin gedişatını izləmək üçün ain.az saytında ən son yeniliklərə baxın.
