Neftçala Olimpiya İdman Kompleksi yeniyetmə və gənclərin
sevimli ünvanıdır
İdmanın inkişafı bu gün dövlətimizin prioritet istiqamətlərindəndir.
Bütün məsələlər kimi, bu mühüm sahə də Ulu Öndər Heydər Əliyevin siyasi kursunu
uğurla davam etdirən Prezident İlham Əliyevin diqqət mərkəzindədir. Bunun sayəsində
ölkənin hər yerində Olimpiya İdman kompleksləri, idmanın ayrı-ayrı növləri üzrə
mərkəzlər tikilir, idman qurğuları lazımi avadanlıqlarla təchiz edilir, kadr
potensialı möhkəmləndirilir.
İdman sahəsində görülən tədbirlər gənclərimizin fiziki və mənəvi
cəhətdən möhkəmlənməsinə, onların asudə vaxtlarının səmərəli keçməsinə, gənclərin
pis vərdişlərdən uzaqlaşmasına, onlarda vətənpərvərlik hisslərinin güclənməsinə,
fəal vətəndaşlıq mövqeyinin inkişafına vəsilə olur. Azərbaycan gənclərinin müntəzəm
olaraq idmanla məşğul olması nəticədə onların hərbi sahədəki uğurları ilə
birbaşa bağlıdır. 44 günlük Vətən müharibəsində bu cəhət özünü bariz şəkildə
göstərdi. Şuşa kimi alınmaz qalanın mənfur düşməndən heç bir hərbi texnika tətbiq
etmədən təmizlənməsində gənc əsgərlərimizin idmançı çevikliyinin, igidliyinin,
cəsurluğunun necə böyük rol oynadığı hamının yadındadır.
Azərbaycan idmançıları müxtəlif növlər üzrə keçirilən beynəlxalq
yarışlarda uğurla çıxış edərək fəxri kürsünün ən yüksək pilləsinə qalxır,
bayrağımızı dalğalandırır, himnimizi səsləndirirlər. Bunlar hər bir azərbaycanlının
qəlbini qürur hissi ilə doldurur. İdmançılarımız qazandıqları qələbələrə görə
dövlət tərəfindən yüksək mükafatlarla təltif olunurlar. Məhz bunların nəticəsidir
ki, ölkəmizdə bu gün idman və bədən tərbiyəsi kütləvi hal almışdır.
Neftçalada idmanın zəngin ənənələri var. Keçən əsrin
60-80-ci illərində rayonda idmanın boks, ağırlıqqaldırma, futbol növləri üzrə
uğurlu nəticələr əldə olunub. Respublika, eləcə də keçmiş SSRİ miqyasında
keçirilən müxtəlif yarışlar və turnirlərdə uğurlu çıxış edən rayonun
idmançıları Azərbaycanın, o cümlədən doğulub boya-başa çatdıqları Neftçalanın
idman şərəfini layiqincə qorumuşlar. İdman ustası titulunu daşıyan həmin
idmançılar yaşlı nəslin nümayəndələri tərəfindən bu gün də xoş və unudulmaz
xatirələrlə anılırlar.
Adından da göründüyü kimi, Neftçala neft ərazisidir. Burada
neft və qazçıxarma, yod-brom, kimya və balıqçılıq müəssisələri uzun illərdən bəri
mövcuddur. Yaxın keçmişə qədər həmin idarələr tam gücləri ilə fəaliyyət göstərirdi.
Bu müəssisələrdə çalışan cavanlar rayonda idmanın inkişafına da öz töhfələrini
vermişlər. İndi SOCAR-ın
balansında olan futbol stadionu o illərin yadigarıdır. Stadion bu gün
neft şirkətinin diqqət mərkəzindədir. Vaxtaşırı olaraq təmir edildiyi üçün
stadionda tez-tez yarışlar və digər kütləvi idman tədbirləri keçirilir.
Neftçala Olimpiya İdman Kompleksi isə 2022-ci ildən fəaliyyət
göstərir. Açılışında Prezident İlham Əliyevin iştirak etdiyi kompleks 4 hektar ərazidə
salınmışdır. Möhtəşəmliyi ilə özündən əvvəlkilərdən fərqlənən Olimpiya
kompleksi memarlıq cəhətdən Neftçala şəhərinə xüsusi yaraşıq verir. Burada 770
yerlik universal zal, süni örtüklü açıq və qapalı mini-futbol meydançası, 224
tamaşaçı yerlik üzgüçülük hovuzu, aerobika, boks, ağır atletika, trenajor,
şahmat, gimnastika, güləş, taekvando-karate zalları, 28 nəfərlik kafe-restoran,
28 qonaq otağı olan mehmanxana, açıq havada idman meydançaları, qaçış zolağı,
digər köməkçi və texniki binalar var. Təcrübəli məşqçilərin təşəbbüsü ilə
kompleksə cəlb edilən yeniyetmələr və gənclər futbol, üzgüçülük, bədii
gimnastika, trenajor, boks, güləş, cüdo, ağır atletika, stolüstü tennis idman
növləri üzrə tərtib edilmiş qrafik əsasında müntəzəm məşq edir, seçdikləri
idman növünün sirlərini dərindən mənimsəyirlər. Və bütün bunlar, təbii ki, nəticəsiz
qalmır. Mirzəqurbanlı kənd tam orta məktəbin 8-ci sinif şagirdi Aynişan Rzazadə
bu yaxınlarda qızlar arasında keçirilən boks birinciliyində 48 kiloqram çəki dərəcəsi
üzrə gümüş medalın sahibi olmuşdur. Gimnastika üzrə məşqçi Flora Babaşova isə hər
həftə 3 dəfə Bakıdan Neftçala şəhərinə gələrək yeniyetmə qızlara bu zərif
idmanın sirlərini öyrədir. Çəkdiyi zəhmət də hədər getmir. Artıq neftçalalı
qızlardan ibarət 11 nəfərlik komanda formalaşıb. "Gimnastika hamı
üçün" layihəsi çərçivəsində bu günlər Bakıda keçirilən beynəlxalq tədbirdə
həmin komanda uğurla çıxış edərək 3-cü olmuşdur.
Kompleksdə vaxtaşırı dövlət qulluqçuları, müəllimlər, həkimlər,
tələbələr, şagirdlər arasında intellektual yarışlar, "Şahin" hərbi
idman oyunları, rayon və respublika birincilikləri keçirilir. Ölkənin ali məktəblərinin
müəllim-tələbə heyəti hər il bir neçə dəfə kompleksin qonağı olaraq fiziki
hazırlıqlarını möhkəmləndirir, Xəzərin sahilində yerləşən Neftçala şəhərinin
sosial həyatı ilə tanış olurlar. Elə bu yaxınlarda ayrı-ayrı günlərdə Sumqayıt,
Lənkəran, Zaqatala dövlət universitetlərinin tələbələri 3 gün kompleksdə həm
qonaq olmuş, həm də fiziki hazırlıqlarını möhkəmləndirmişlər.
Söz düşmüşkən onu da qeyd edək ki, Neftçala Olimpiya İdman
Kompleksində hər cür şərait olduğundan Neftçala Uşaq-Gənclər İdman Məktəbi bura
köçürülmüşdür.
Olimpiya idman kompleksində həyat, necə deyərlər, hər gün
bulaq kimi qaynayır. Yeniyetmələr, gənclər çiyinlərində idman çantası ya
kompleksə daxil olur, ya da məşqi başa çatdıraraq evlərinə yollanırlar. Onların
hər birinin çöhrəsində sevinclə bərabər, qələbə hissi də görmək olur. Bu,
Neftçalanın keçmiş idman şöhrətini yaxın vaxtlarda geri qaytarmaq inamından
doğan bir hissdir.
Seyran CAVADOV,
"Azərbaycan"
