Füzuli Peşə Təhsil Mərkəzinin 700 nəfərlik tələbə tutumuna malik yeni binasının tikintisi sürətlə davam edir.
Bu barədə Elm və Təhsil Nazirliyinin illik hesabatında məlumat verilib.
Bildirilib ki, Mərkəzdə müasir əmək bazarının tələblərinə uyğun olaraq təyyarə və uçan aparatların mühərrikləri üzrə mexanik, pilotsuz uçuş aparatlarının təmiri üzrə texnik, yerüstü aviasiya avadanlıqları üzrə mexanik kimi ixtisaslarla yanaşı, bir sıra digər qabaqcıl və innovativ ixtisasların tədrisi planlaşdırılır.
Bəs, işğaldan azad olunan bölgələrdə peşə məktəbləri niyə zəruridir?
İşğaldan azad olunmuş bölgələrdə belə peşə məktəblərinin yaradılması bir neçə mühüm səbəblə izah olunur. Birincisi, bu ərazilərin sürətli bərpası və dayanıqlı inkişafı üçün insan kapitalına ciddi ehtiyac var. Müharibə nəticəsində tamamilə dağılmış şəhərlərin, kəndlərin yenidən qurulması və sosial-iqtisadi həyatın canlandırılması yalnız müasir bilik və bacarıqlara sahib kadrlarla mümkündür. Məhz peşə təhsil mərkəzləri konkret istehsalat sahələrinə uyğun ixtisaslı kadrların hazırlanmasında əsas rol oynayır. İnfrastrukturun bərpası, kənd təsərrüfatının, sənayenin, xidmət sektorunun inkişafı peşə təhsilli mütəxəssislərin fəaliyyətini tələb edir. Bu baxımdan Füzuli kimi strateji bölgədə aviasiya, logistika, yüksək texnologiyalar üzrə kadr hazırlığı həm regional məşğulluğu artıracaq, həm də ölkənin müdafiə qabiliyyəti və iqtisadi potensialının möhkəmlənməsinə dəstək olacaq.
Digər tərəfdən, işğaldan azad olunan rayonlarda əhalinin uzunmüddətli məskunlaşması üçün yalnız mənzil və infrastruktur tikmək kifayət deyil, burada yaşayan gənclərə peşə və gəlir qazandıracaq imkanlar yaradılmalıdır. İnsanlar doğma torpaqlarına qayıdıb orada qalmaq üçün real iş yerlərinin və karyera inkişafının mövcudluğunu görməlidir. Peşə məktəbləri bu baxımdan həm təhsil, həm məşğulluq, həm də sosial inteqrasiya baxımından vacib platformadır. Xüsusən də gənclər üçün bu cür mərkəzlər perspektivli ixtisaslara yiyələnmək, iş tapmaq, regionun inkişafında aktiv iştirak etmək üçün fürsət pəncərəsidir.
