“Son on illər ərzində televiziya həqiqətən də dəyişib. Ola bilər, sərbəstlik əldə edib, müsbət haldır, amma bu sərbəstlik bəzən müəyyən qədər məsuliyyətsizliyə gətirib çıxarır. Məsuliyyət təkcə siyasi məsələlərə aid deyil. Biz eyni zamanda öz əxlaqımızın, mənəviyyatımızın, dəyərlərimizin qarşısında məsuliyyət daşıyırıq. Efirlərdə isə belə şeylər olur, bunu inkar edə bilmərəm. Hər kəs bilir ki, verilişlərin qarşısında reytinq borcu qoyulur. Buna görə də nəyin bahasına olursa-olsun, reytinq əldə etmək istəyirlər. Bu isə nəyin bahasına başa gəlir? Elə şeylərin bahasına başa gəlir ki, biz bundan əziyyət çəkirik. Sanki mənəvi gücümüz bunun qarşısında müəyyən qədər geri çəkilir. Görünür, bu axının qarşısı inzibati şəkildə alınmalıdır. Mən özüm də narazılığımı bildirmişəm”.
Bu sözləri Pravda.az-a tanınmış ssenarist, kinoşünaş Nadir Bədəlov televiziya kanallarında fəaliyyət göstərən Bədii Şuraların tənqid edilməsinə münasibət bildirərkən deyib.
O, “ARB” TV-də Bədii Şuranın sədri olması ilə bağlı ictimaiyyətə verilən məlumata aydınlıq gətirib: “Mən heç vaxt “ARB” TV-də Bədii Şuranın sədri olmamışam. “ARB Şəki” telekanalı ilə əməkdaşlıq etmişəm. Sonradan “ARB Region” televiziyası oldu. Bilavasitə “ARB” ilə əməkdaşlıq etməmişəm, sədr olmamışam”.
Aytəkin Qardaşova
