AZ
Mövzular
Siyasət
18.07.2025 ◦ 17:32

Paşinyanın “sülh üçün heç bir fürsəti qaçırmırıq” bəyanatı səmimi və doğru deyil — Deputat

İrəvan və Bakı sülh sazişini imzalamazdan əvvəl onu paraflaya bilər.  Nikol Paşinyan mətbuat konfransında bildirib ki, belə bir ideya da var.  Onun sözlərinə görə, Ermənistan Azərbaycanla sülh sazişinin imzalanması yolunda heç bir imkanı əldən vermir.

 Məsələ ilə bağlı Milli Məclisin deputatı Hikmət Babaoğlu Demokrat.az-a açıqlamasında deyib ki,  paraflanma imzaya qədər olan mərhələdir və tərəflərin ortaq razılığı əsasında razılaşdırılmış sənəddir:

“İki ölkə arasında etibar və etimad mühiti olmadığına görə paraflanma, layihənin imzalanmasına doğru növbəti bir addım ola bilər. Lakin Ermənistanın baş naziri Paşinyanın “sülh üçün heç bir fürsəti qaçırmırıq” bəyanatı səmimi və doğru deyil. Çünki Paşinyan müharibədən dörd il sonra da Azərbaycanın təqdim etdiyi sülh konsepsiyasını imzalamaq fürsətini dəfələrlə bilərəkdən və məqsədli şəkildə qaçırıb, sənədi imzalamaq istəməyib. Bu gün də həmin sənədi imzalamaq istəyib-istəmədiyi dəqiq deyil. Buna görə də Paşinyan burada özünü sülhpərvər kimi göstərməyə çalışır, guya hər fürsətdə sənədi imzalamağa hazırdır. Amma imzalanacaq sənəd sadəcə fürsət sənədi deyil, söz sənədi olmalıdır yəni, dayanıqlı, əsaslı və genetik olaraq uyğun bir sənəd olmalıdır. Bütün bunlar isə Azərbaycanın sülh konsepsiyasının əsasını tanımadan mümkün deyil və Paşinyan bunu qəbul etmək istəmir. Bu səbəbdən hesab edirəm ki, Paşinyan bu məsələdə səmimi deyil. Amma nəticə etibarilə bu uzunmüddətli sülh fürsəti əldən buraxıla bilməz bir gün qarşılıqlı olaraq sülh sənədinə imza atılmalıdır”.

Leyla Turan 
Demokrat.az
Seçilən
32
26
demokrat.az

10Mənbələr