ABŞ prezidenti Donald Tramp Avropa liderlərinə Ukraynaya birbaşa təhlükəsizlik zəmanəti verməyə hazır olduğunu bildirib. Bu barədə The Wall Street Journal xəbər verir.
Söhbətlə tanış olan insanların sözlərinə görə, Tramp Air Force One-dan telefon danışığı zamanı Avropa liderlərinə Ukraynaya birbaşa təhlükəsizlik zəmanəti verməyə əvvəlkindən daha hazır olduğunu bildirib.
Anonim mənbələrə görə, söhbət zamanı ABŞ-ın müharibənin dayandırılmasına dair razılaşmanın təmin edilməsində potensial iştirakının mahiyyəti dəqiqləşdirilməyib və Ağ Ev hələlik təhlükəsizlik zəmanətləri ilə bağlı heç bir açıqlama verməyib.
Trampla danışan Avropa liderləri daha sonra deyiblər ki, onlar “prezident Trampın ABŞ-ın təhlükəsizlik zəmanətlərini verməyə hazır olması ilə bağlı bəyanatını alqışlayırlar”.
Onlar həmçinin xəbərdarlıq ediblər ki, Kreml hərbi əməliyyatları dayandırana qədər Rusiyaya qarşı sanksiyaları və hərbi təzyiqləri artırmağa hazırdırlar.
Böyük Britaniya, Fransa, Almaniya, Finlandiya, İtaliya və Avropa İttifaqının liderləri də qeyd ediblər ki, Rusiya “Ukraynanın Aİ və NATO-ya gedən yoluna veto qoya bilməz”.
Əziz Mustafa
