Almaniyadan Polşaya təzminat ödənilməsi məsələsi həll olunub və Berlin kompensasiya kimi Varşavaya təhlükəsizlik zəmanəti verəcək.
HİT.az xəbər verir ki, bu barədə Almaniya hökumətinin Polşa işləri üzrə komissarı Knut Abraham "RedaktionsNetzwerk Deutschland" (RND) media qrupuna müsahibəsində bildirib.
"Təzminat məsələsi qanuni olaraq həll olunub", deyə Abraham deyib.
Eyni zamanda, komissar qeyd edib ki, məsələnin yekun həlli Almaniyanın öhdəliklərinin bugünkü kontekstdə şərhini tələb edir.
Abraham bildirib ki, indi "Polşanın qurban olduğu dövrdən" fərqli olaraq Almaniya və Polşa bir-birini dəstəkləyir. O qeyd edib ki, Almaniya Polşa ilə hərbi və maliyyə münasibətlərini gücləndirməlidir. O, həmçinin vurğulayıb ki, bu, mövcud təhlükəsizlik məsələsini tarixi öhdəliklərlə əlaqələndirməlidir.
Abraham alman media qrupuna verdiyi müsahibədə vurğulayıb ki, Polşa prezidentinə mesaj ondan ibarət olmalıdır ki, Polşanın təhlükəsizliyinin hər hansı gücləndirilməsi Almaniyanın təhlükəsizliyinin gücləndirilməsidir, istər maliyyə yardımı, istər silah sistemləri, istərsə də Bundesver bölmələri.
Sentyabrın 1-də Polşa prezidenti Karol Navroçki Almaniyanı təzminat ödəməyə çağırıb. O, vurğulayıb ki, “namuslu münasibətlər” qurmaq üçün bu məsələ öz həllini tapmalıdır. Navroçki qeyd edib ki, o, Polşa prezidenti kimi ümumi mənafe üçün Almaniyadan qeyd-şərtsiz təzminat tələb edir. O, Polşanın ədalətə, həqiqətə və Almaniya ilə aydın münasibətlərə ehtiyacı olduğu, eyni zamanda təzminat almağı vacib hesab etdiyi fikrini də ifadə edib.
Samir
