Avropa və Kiyev öz gələcəyinə nəzarət etmək üçün təşəbbüsü ələ almalıdır...
Poliqon xəbər verir ki, Britaniyanın The Economist nəşri Ukraynanın üzləşdiyi maksimum diplomatik risk dövrünün artıq arxada qaldığını yazır. Lakin məqalədə vurğulanır ki, həm Ukrayna, həm də Avropa öz talelərini başqalarının qərarlarına buraxmaq əvəzinə təşəbbüsü öz əllərinə almalıdır. Jurnalın təhlilinə görə, bu addım gecikərsə, Kiyev üçün strateji seçimlər daha da ağırlaşa bilər.
Nəşr qeyd edir ki, 28 maddədən ibarət “kapitulyasiya planı”nın sızmasından cəmi bir həftə sonra ABŞ dövlət katibi, respublikaçı senatorlar və Avropa liderləri vəziyyəti müəyyən qədər nəzarətə götürə biliblər. Onlar danışıqlar prosesində Ukraynanı mümkün qədər müdafiə etməyə çalışacaqlar. Bununla belə, Tramp administrasiyasının qeyri-müəyyən siyasi xətti fonunda planın ən zərərli elementlərini tamamilə bloklamağın mümkün olub-olmayacağına heç kim əmin deyil.
The Economist yazır ki, ilkin sənəd “sülh təşəbbüsü” kimi təqdim edilsə də, əslində növbəti müharibənin zəminini yaradırdı. Plan Ukraynanın özünü müdafiə imkanlarını məhdudlaşdırır, Vladimir Putinin aqressiyasını mükafatlandırır, həmçinin Rusiyaya yenidən silahlanmağa imkan verəcək sanksiyaların qaldırılmasını və investisiyaların bərpasını nəzərdə tuturdu.
Jurnalın fikrincə, Ukrayna üçün uğur o zaman mümkün olacaq ki, ölkə firavan, Qərbə inteqrasiya olunmuş bir demokratiyaya çevrilsin. Lakin bunun üçün tələb olunan əsas amillər — kapital, insan resursları və təhlükəsizlik — risk altındadır. Əgər Rusiya istənilən anda yenidən hücuma keçə biləcəksə, nə investisiya, nə də əhali ölkədə qalmaqda maraqlı olacaq.
Məqalədə bildirilir ki, uzun sürən və tükəndirici müharibə nəticəsində Ukraynanın ən böyük problemi resurs çatışmazlığıdır — həm canlı qüvvə, həm də silah baxımından. Avropa İttifaqı, iqtisadiyyatı Rusiyadan on dəfə böyük olan bir blok kimi, bu çatışmazlığın aradan qaldırılmasına kömək edə bilər. Bunun üçün Avropanın genişmiqyaslı, çoxillik maliyyə dəstəyi həyati əhəmiyyət daşıyır.
Lakin nəşr qeyd edir ki, Avropa liderləri təhlükənin miqyasını başa düşsələr də, real addımlar atmaqda ləngiyirlər. “Əgər Avropa Brüsselin indiki templəri ilə hərəkət etsə, yardımlar Ukraynanı xilas etməyə yetəcək qədər tez çatmayacaq,” – deyə məqalədə vurğulanır.
- Poliqon.info
