İsrail Suriyanın yeni prezidenti Əhməd əş-Şaraanın mövqelərini zəiflətmək məqsədilə ölkədəki druz silahlı qruplarına dəstək göstərib.
KONKRET.az xəbər verir ki, bu barədə The Washington Post nəşri hazırkı və keçmiş israilli rəsmilərə istinadən məlumat yayıb.
Qəzetin yazdığına görə, artıq 2024-cü ilin dekabrında — Bəşər Əsəd rejiminin devrilməsindən cəmi doqquz gün sonra — İsrail hərbçiləri druz silahlı dəstələrinə silah ötürüb. Yardıma təxminən 500 tüfəng, döyüş sursatı və bronjiletlər daxil olub.
Məqalədə qeyd olunur ki, İsrailin əş-Şaraaya münasibəti onun keçmiş fəaliyyəti səbəbindən ehtiyatlı olaraq qalır. Belə ki, o, təxminən on il əvvəl formal olaraq “Əl-Qaidə” terror təşkilatı ilə əlaqələri olan silahlı qruplaşmaya rəhbərlik edib.
İsraildən druzlara silah tədarükünün pik dövrü 2025-ci ilin aprel ayına təsadüf edib. Avqust ayında isə bu ötürmələr dayandırılıb. Buna səbəb kimi Əhməd əş-Şaraa ilə başlayan danışıqlar, eləcə də israilli rəsmilərin druz qüvvələrinin etibarlı hərbi tərəfdaş olub-olmaması və qarşıya qoyulan məqsədləri reallaşdıra bilməsi ilə bağlı şübhələri göstərilir.
Bununla belə, İsrail druz icmasına qeyri-öldürücü hərbi avadanlıqların çatdırılmasını davam etdirir. Bildirilir ki, hazırda havadan bronjiletlər və tibbi ləvazimatlar atılır.
Müşviq Tofiqoğlu
KONKRET.az
