Britaniyanın The Times nəşri Rusiya Prezidenti Vladimir Putinin ABŞ Prezidenti Donald Tramp və Ukrayna Prezidenti Volodimir Zelenski arasında aparılan danışıqlara təsir göstərməyə çalışdığını iddia edib. Lakin ekspertlər qeyd edirlər ki, Moskvanın bu cəhdləri Ukraynanın beynəlxalq legitimliyini və danışıqlardakı əsas tərəf statusunu dəyişmir.
Nəşrin yazdığına görə, Putin Trampın Zelenski ilə Floridada keçirilən görüşündən əvvəl ABŞ prezidenti ilə telefon danışığı apararaq diplomatik təşəbbüsü ələ almağa çalışıb. The Times bunu “diplomatik üstünlük” kimi təqdim etsə də, siyasi müşahidəçilər bu yanaşmanın Kremlin informasiya manipulyasiyasına xidmət etdiyini bildirirlər.
Qəzet iddia edir ki, Putin Zelenskinin Mar-a-Laqoya səfərindən əvvəl də Trampla əlaqə saxlayaraq onun mövqeyinə təsir göstərməyə cəhd edib. Bununla belə, faktiki proseslər göstərir ki, Ukrayna lideri Volodimir Zelenski Tramp ilə birbaşa görüşlər zamanı ölkəsinin mövqeyini açıq və prinsipial şəkildə ifadə etmək imkanı əldə edib.
Nəşrin daha bir iddiasına görə, Zelenski Trampla şəxsi təmas qurduğu anlarda belə, Putin “uzaqdan danışıqlara təsir göstərməyə” çalışıb. Analitiklər hesab edirlər ki, bu iddialar Rusiyanın öz təsir imkanlarını şişirtmək cəhdindən başqa bir şey deyil və real qərarvermə prosesində həlledici rol oynamır.
Xatırladaq ki, dekabrın 28-də ABŞ Prezidenti Donald Tramp və Ukrayna Prezidenti Volodimir Zelenski Floridada görüşüblər. Görüşdən əvvəl Tramp Rusiya Prezidenti Vladimir Putinlə də telefon danışığı aparıb. ABŞ prezidenti hər iki tərəflə Ukrayna böhranının həlli yollarını müzakirə etdiyini bildirib.
Tramp Zelenski ilə görüşü “şok edici və açıq danışıq” kimi xarakterizə edib ki, bu da Ukraynanın mövqeyinin Vaşinqtonda diqqətlə dinlənildiyini göstərir. Eyni zamanda, Tramp Putinin zəngini “yaxşı və məhsuldar” adlandırsa da, Kreml tərəfindən elan edilən növbəti telefon danışığı hələlik real nəticə ilə müşayiət olunmayıb.
Siyasi şərhçilərin fikrincə, Qərb mediasında Putinin “üstünlüyü” barədə səsləndirilən iddialar daha çox psixoloji və informasiya müharibəsinin tərkib hissəsidir. Reallıqda isə Ukrayna beynəlxalq hüquqa əsaslanan mövqeyi ilə danışıqlar prosesinin əsas və legitim tərəfi olaraq qalır.
