ain.az, Gununsesi portalından verilən məlumatlara əsaslanaraq xəbər verir.
İranda etirazlar ciddi şəkildə davam edir və vəziyyət ölkədə gərginliyi daha da artırır.
Siyasi şərhçilər hesab edir ki, bölgədə siyasət və əməkdaşlıqda mühüm rol oynayan Türk Dövlətləri Təşkilatı bu vəziyyətdə İran prezidenti Məsud Pazeşkianı dəstəkləməlidir.
Məsələyə münasibət bildirən türkiyəli politoloq Həsən Oktay Gununsesi.info -ya belə danışıb:
“Yanvar ayında baş verən ciddi inflyasiya nəticəsində dükan sahibləri bizneslərini aça bilmədi və bu, genişmiqyaslı küçə etirazlarına səbəb oldu. Bəzi analitiklər bunun xaricdən dəstəkləndiyini iddia etsələr də, əslində bu, İranın daxili idarəetmə böhranının təzahürüdür. Tramp və Netanyahunun Əl-Əqamişdəki görüşü isə bu etirazların xaricdən dəstəklənən hərəkat kimi xarakterizə olunmasına imkan verdi. Lakin İranın iqtisadi çöküşünün daxili səbəbləri nəzərə alınmalıdır.
ABŞ-ın Venesuelaya müdaxiləsini və Yaxın Şərqdə belə addımların uğursuz nəticələrini nəzərə alaraq, Türk Dövlətləri Təşkilatı İranın seçilmiş prezidenti Məsud Pazeşkianı dəstəkləməli və İranda sosial islahatların yolunu açmalıdır. Bu kontekstdə həm Türk Dövlətləri Təşkilatı, həm də İslam Əməkdaşlıq Təşkilatı İran məsələsi ilə bağlı yol xəritəsi hazırlamaq üçün təcili toplanmalıdır”.
Politoloq onu da qeyd edib ki, İrandakı münaqişələr qonşu ölkələr üçün ciddi problemlər yaradacaq.
“Miqrasiya hərəkatları, iqtisadi böhran və İranın geniş coğrafiyası bu problemlərin regiona yayılmasına səbəb ola bilər. Buna görə də, Türk Dövlətləri Təşkilatı və İslam Əməkdaşlıq Təşkilatı İranın ərazi bütövlüyünü qorumaq və sistemli dəyişiklik yolu ilə daxili problemləri həll etmək üçün dərhal yol xəritəsi hazırlamalıdır”,-deyə Həsən Oktay fikirlərini yekunlaşdırıb.
Şəbnəm Rəhimova
Gununsesi.info
Ən son xəbərləri və yenilikləri almaq üçün ain.az saytını izləyin.
