Tbilisi, 10 yanvar, AZƏRTAC
Dünya Karate Federasiyasının Tbilisidə idman karatesi üzrə keçirdiyi beynəlxalq turnirdə iştirak etməkdən çox məmnunam. İnanıram ki, Azərbaycan bayrağını ucaldacağam.
Bu sözləri AZƏRTAC-a müsahibəsində turnirin finalına yüksəlmiş Azərbaycan milli komandasının üzvü, İslam Oyunlarının bürünc mükafatçısı Mədinə Sadıqova söyləyib. "Bu yarışa gəlməmişdən əvvəl çox gərgin məşq toplantısı keçirmişik. Məqsədim A Seriyasında yaxşı reytinq xalı toplamaq, gələcəkdə 32-likdə və daha böyük yarışlarda iştirak etməkdir. Artıq finaldayam, inanıram ki, birinci yerə çıxacağam, Azərbaycan Himnini səsləndirəcəyəm və bayrağımızı yüksəldəcəyəm", - deyə o bildirib.
Qeyd edək ki, 24 yaşlı Mədinə Sadıqova 55 kiloqram çəki dərəcəsində tatamiyə çıxaraq turnirdə 5 idmançını məğlub edərək finala yüksəlib
Qeyd edək ki, Tbilisidə keçirilən turnirdə dünyanın 70-dən çox ölkəsindən 1200-ə yaxın idmançı iştirak edir. Bu mötəbər yarışda Azərbaycan 21 karateçi ilə təmsil olunur.
Xətayi Əzizov
AZƏRTAC-ın xüsusi müxbiri
Tbilisi
