Ses qazeti saytından alınan məlumatlara görə, ain.az xəbər verir.
2020-ci ildə əldə etdiyimiz böyük Zəfər 30 il işğal altında olan, həm də əksər yurd yerlərində daşı-daş üstündə qalmayan şəhər və kəndlərə yeni həyat bəxş etdi. Budur. Artıq 6 ildir ki, Qarabağda və Şərqi Zəngəzurun müəyyən ərazilərində bərpa, quruculuq işləri vüsətlə aparılır, soydaşlarımız öz ata-baba yurduna, doğma evinə qayıdır.
Ağdərə rayonu isə böyük Zəfərdən düz üç il sonra, 2023-cü ilin 19-20 sentyabrında birgünlük lokal xarakterli antiterror əməliyyatı zamanı düşməndən təmizlənən Xankəndi, Xocalı, Xocavənd kimi yaşayış ərazilərindəndir. Düşmənin dağıtdığı, viran etdiyi, bu gün isə abadlaşan, yurddaşına verilən yurd yerimizdir.
Yanvarın 13-də dövlətimizin başçısı cənab İlham Əliyevin Ağdərədə olması bu yurd yerində neçə-neçə obyektlərin həyata yenidən vəsiqə alması, təməlinin qoyulması ilə nəticələndi. Bütün bunlar isə təbii ki, insan amilinə verilən dəyərdir. Çünki yurd yerləri nə qədər sürətlə abadlaşırsa, yurddaşları yurduna daha tez qayıdır, uzun həsrətin xoş vusal anını yaşamaq nəsibləri olur.
Ağdərənin Çapar, Heyvalı, Çıldıran, Aşağı Oratağ kəndləri
Ağdərəyə səfəri çərçivəsində dövlətimizin başçısı bu kəndlərin hər birində olub, bu yurd yerlərində görülən işlərlə tanış olub, öz tövsiyə və məsləhətlərini verib. Daha sonra Ağdərə rayonunun Aşağı Oratağ kəndində Aşağı Oratağ, Çıldıran, Heyvalı və Çapar kəndlərinin sakinləri ilə görüşü, onlarla söhbətləri hər dəfə məcburi köçkün, şəhid ailələri və qazilərlə görüşlərində olduğu kimi istiliyi, səmimiliyi ilə unudulmaz ana çevrilib, sakinlərə onlara yurdunu, evini qaytaran Liderlə görüşmək sevincini yaşadıb.
Prezident İlham Əliyev: Uzun illərin həsrəti arxada qaldı, haqq-ədalət Zəfər çaldı. Azərbaycan öz ərazi bütövlüyünü, suverenliyini bərpa etdi. Azərbaycanlılar öz dədə-baba torpaqlarına qayıdıblar və burada qürurla yaşayacaqlar, xoşbəxt yaşayacaqlar, rahat yaşayacaqlar. Əminəm ki, bundan sonra müharibə olmayacaq. Azərbaycan dövləti güclü dövlətdir.
Son iki il ərzində, - antiterror əməliyyatından sonra, - 2023-cü ildən bu yana bütün bu bölgələrdə - Ağdərədə, Xocalıda, Xankəndidə, Xocavənddə həyat bərpa edilir. Beş il bundan əvvəl isə vaxtilə işğal altında olmuş digər ərazilərə köçkünlər qayıtmağa başlayıblar. Bu gün artıq 73 min insan - həm keçmiş köçkün, həm də ki, köçkün olmayan, amma azad edilmiş ərazilərdə işləyənlər, çalışanlar, oxuyanlar yerləşiblər və hər ay Qarabağa qayıdan vətəndaşların sayı artır. Burada şərait yaradılıb - işıq, su, qaz, yollar, iş yerləri.
Bu gün Qozlukörpü kəndində təxminən 15 meqavat gücündə su elektrik stansiyasının açılışını qeyd etdik. Bu bölgə elektriklə tam təmin edilib. Hətta burada istehsal olunan enerji Azərbaycanın digər bölgələrinə də ötürülür. Yollar çəkilir. Buradan Tərtərə qədər, Kəlbəcərə qədər yollar tikilir, genişlənir. Bu gün “Dəmirli” Filiz Emalı Kompleksinin fəaliyyəti ilə də tanış oldum. Orada 1000-ə yaxın iş yeri yaradılır. Yəni iş yerləri ilə bağlı heç bir problem olmayacaq. Həm dövlət, həm özəl sektor tərəfindən şərait yaradılır. Eyni zamanda, bu gözəl, səfalı, mənzərəli təbiətdən istifadə edərək əkinçilik, heyvandarlıq, arıçılıq, meyvəçilik - bütün bu işlərlə mütləq məşğul olmaq lazımdır ki, siz burada rahat, firavan yaşayasınız.
Bəli, görülən işlərin hər biri 30 il ərzində məcburi köçkün həyatı yaşayan, bu həyatın hər üzünü görən minlərlə soydaşımızın rahatlığı, firvanlığı, öz evində çırağını yandırması, torpaqlarımızın insan nəfəsinə olan təşnəsini aradan qaldırmağa, minlərlə hektar torpağa yeni həyat verməyə hesablanıb.
Elə bir görüş olmaz ki, orada şəhidlərimiz anılmasın
Dövlətimizin başçısı çıxışlarının, müsahibələrinin, keçmiş məcburi köşkünlərlə görüşlərinin elə biri yoxdur ki, orada şəhidlərimiz anlmasın, onların şücaətindən söhbət açılmasın. Bu, dövlətin vətəndaşına verdiyi dəyər, dövlət-xalq birliyinin, xalqın övladını öz övladı hesabetmə hissi, qədirbilənlik göstəricisidir.
Prezident İlham Əliyev Ağdərədə rayonunda səfər etdiyi kəndlrin sakinləri ilə görüşü zamanı da şəhidlərimizi xatırladı, onların şücaətindən söhbət açdı: Allah bütün şəhidlərimizə rəhmət eləsin. Onların qanı, canı bahasına, qəhrəman döyüşçülərimizin şücaəti, rəşadəti hesabına biz bu gün bu torpaqlardayıq. Biz şəhidlərimizin əziz xatirəsini qəlbimizdə əbədi yaşadacağıq. Onu da bildirməliyəm ki, şəhidlərimizin qanını artıq biz döyüş meydanında aldıq. Onların qanı yerdə qalmayıb. İşğal dövründə dəfələrlə bu sözləri biz eşitmişik, işlətmişik və bu arzularla yaşamışıq. Çünki torpaqların itirilməsi, böyük sayda şəhidlərin şəhadətə ucalması - bütün bu ədalətsizliklər bizi xalq olaraq çox incidirdi, ancaq bizi sarsıtmadı. Biz əyilmədik, iradəmizi göstərdik və döyüş meydanında həm şəhidlərimizin qisasını aldıq, həm də torpaqlarımızı qaytardıq. Son 80 il ərzində Azərbaycan kimi tam və mütləq Qələbə qazanan ikinci ölkə olmayıb. Müharibələr olub, münaqişələr olub, bu gün də davam edir. Amma heç biri tam və mütləq Qələbə ilə nəticələnməyib. Ancaq biz böyük xalq olaraq buna nail olduq, özü də cəmi 44 gün ərzində. Ondan sonra da bir gün ərzində. Biz şanlı Zəfərimizi, Zəfər yürüşümüzü iki mərhələyə bölərək həm də cavanlarımızı qoruduq. Çünki əgər 2020-ci il noyabrın 10-da müharibə dayanmasaydı, bəlkə də minlərlə şəhid verməli olacaqdıq. O cümlədən bax burada, bu dağlarda, Ağdərə dağlarında, Kəlbəcər dağlarında, Laçın dağlarında, Ağdamın minalanmış zolaqlarında minlərlə şəhid verə bilərdik. Biz onları qoruduq, onları qurban vermədik. Ancaq bilirdik ki, gün gələcək və biz bütün Qarabağı qaytaracağıq, ərazi bütövlüyümüzü bərpa edəcəyik, mənfur düşməni torpaqlarımızdan qovacağıq və tam Qələbə qazanacağıq. İndi də burada, - bir tərəfdə şəhid anası, bir tərəfdə ağbirçək, - sizinlə bərabər durmuşuq. Bu, çox xoşbəxt bir hissdir, xoşbəxt bir gündür, gözəl bir gündür. Sizi ürəkdən təbrik edirəm, burada xoşbəxt yaşayın. Sağ olun.
Bu torpaqların sahibləri bizik, biz gəlmişik və biz qurub-yaradırıq
Kənd sakinləri ilə görüşü zamanı dövlətimizin başçısı həmçinin Ağdərəyə düşmən tərəfindən edilən sitəmdəm, onun dünənindən və gələcəyindən də söhbət açıb: Bu gün Ağdərə şəhərinin təzə Baş planı mənə təqdim ediləcək. Ağdərə şəhərini də biz yenidən quracağıq, necə ki, artıq doqquz kəndi abadlaşdırmışıq. Şəhəri də quracağıq. Bura çox gözəl bir sənaye və turizm mərkəzi olacaq. Bu səfalı yerlər göz oxşayır. Hər tərəf dağ, meşə, gözəl hava, bulaqlar, çaylar. Ona görə Ağdərənin gələcək inkişafı çox parlaq olacaq. İşğalçılar bu ərazidə faktiki olaraq heç bir salamat bina qoymayıblar. Bax, təmir edilmiş bütün bu binalar bu gün dövlət tərəfindən təmir edilib. Ancaq talançılıqla məşğul olublar. “Dəmirli” filiz yatağından bəlkə 2 milyard dollar dəyərində, bəlkə də çox mis aparıblar. Bu, talançılıqdır, qanunsuz istismardır. İndi biz qayıtmışıq, orada işlər qurulub. Qeyd etdiyim kimi, orada 900-dən çox, təqribən 1000-ə qədər iş yeri yaradılacaq. Özü də tapşırıq vermişəm ki, oraya cəlb olunacaq vətəndaşlar bu bölgədə yaşayan vətəndaşlar olmalıdır. İndi oranı genişləndirmək üçün mütləq əlavə sərmayə də qoyulacaq.
Kənd təsərrüfatı, turizm – yəni bura təbii bir cənnətdir. Amma mənfur düşmən buranı viran qoyub, burada daşı daş üstə qoymayıb. Onlar hər il erməni təşkilatları tərəfindən 100 milyonlarla pul yığırdılar. Onların bir manatını da, bir dollarını da buraya qoymayıblar, hamısını talayıblar. Bizim evlərimizi yandırıblar, sizi didərgin salıblar, 1 milyon insanı didərgin salıblar, Ağdamı yerlə-yeksan ediblər, Füzulini də, Zəngilanı da, Qubadlını da. Kəlbəcərdə, Laçında, Xocalıda qanunsuz məskunlaşmışdılar. Xocalıya bir eybəcər ad da vermişdilər, amma heç biri tutmadı. Çünki bu torpaqların sahibləri bizik, biz gəlmişik və biz qurub-yaradırıq.
Çox sevindirici və qürurvericidir ki, dünən birlik olub işğaldan azad etdiyimiz torpaqarımızda bu gün birlikdə abadlıq, bərpa işləri aparır, görüşlər keçiririk. Hər ölkədə dövlət başçısının xalqla belə səmimi görüşlərinin, söhbətlərinin olmadığını nəzərə alsaq, əlbəttə, qürur duyuruq ki, vətəndaşına torpağını, itkin övladını, doğma yurdunu, evini qaytaran Lider hər dəfə onlarıın yanında olmaqla, insanlara 30 ildə çəkdikləri acıları unutmaqda mənəvi dayaq olur. Bu, əsl dövlət-xalq birliyi, vətəndaşa verilən dəyər, bu torpaqların sahibinin biz olduğunun, ona görə də qayıtdığımızın, yurdumuza sahib çıxdığımızın göstəricisidir.
Mətanət Məmmədova
Hadisənin gedişatını izləmək üçün ain.az saytında ən son yeniliklərə baxın.
