ain.az, Moderator.az saytına istinadən bildirir.
“Adlar hər bir xalqın milli birliyi, kimliyidir. Adların verilməsində, qorunmasında, dilin özünün saflığının təmin edilməsində milli adların verilməsi üstünlük təşkil edir. Adlar və soyadlar komissiyasında da adların verilməsində bu prinsip əsas götürülür və adların verilməsində Azərbaycan dilinin daxili imkanlarından geniş istifadə edilir”.
Bunu Moderator.az-a açıqlamasında Nazirlə Kabineti Yanında Terminologiya komissiyasının sədr müavini, filologiya elmləri doktoru, professor Sayalı Sadıqova deyib.
O daha sonra əlavə edib:
“Statistik məlumatlara əsasən son illərdə verilən adlar milli adlardır. Ən çox Uğur, Atilla, eləcə də Ayxan, Alpər, “Dədə Qorqud” dastanında işlədilən Beyrək adının qaytarılması, uşaqlara verilməsi sevindirici haldır. Tarixən bizim dilimizdə işlədilən türk mənşəli adlar daha çox öz əksini tapır. Əlbəttə bir çox məqamlar var ki, hazırda valideynlərin çoxu Azərbaycan dilində olan adlardan yox, əcnəbi adlardan istifadə edir. Bu adların çoxu inglis, yunan, ərəb, fars mənşəli adlardır. Bu adların verilməsi bir çoxuna mənasına, uşağın cinsinə görə uyğun gəlmədiyi üçün Adlar və Soyadlar komissiyası tərəfindən tövsiyyə olunmur. Müraciət olunur ki, uşağın adı Alvenida olsun. Alvenida inglis dilinə məxsus olan bir addır və Azərbaycan dilinin heç bir ədəbi dil normasına uyğun gəlmir. Ərəb, fars mənşəli adlar tarixən bizim dilimizdə işlənib və bu adların verilməsi müsbət qarşılanır. Bu baxımdan Məhəmməd, Xədicə, Fatimə, Zəhra adı dilimizə oturuşub” deyə Sayalı Sadıqova bildirib.
Sayalı Sadıqova bildirib ki, bəzi hallarda Adlar və Soyadlar komissiyası da valideynlərin uşaqlara verdiyi adlara qarışa bilir:
“Qeydiyyat idarələrindən bizə müraciət edirlər. Müraciətlərdən biri Nərmin adını dəyişdirib Nora şəkilində verilməsi idi. Bunu da belə əsaslandırırdılar ki, Nərmin adına nisbətə Nora daha yaxşıdır. Biz elmi təhlillər əsasında müəyyənləşdirdik ki, Nora ola bilməz. Təkcə tövsiyyələr deyil, müəyyən adlar var ki, yazılışı, dildə tarixən işlənilməməsi və mənşəyi nəzərə alınaraq verilmir. Fərahim adının Axilles adına dəyişdirilməsi də müraciət olunmuşdu. Şəlalə də bizim dildə işlədilən və çox yayılan adlardan biridir. Şəlalə adını Maşa adı ilə dəyişdirmək istəyirlər. Bu nə dərəcədə düzgündür? Əlbəttə ki, belə adların verilməsinin qarşısı alınır. Ən çox da ədəbi dil normaları pozulur. Məzahir adı üçün də müraciət edib bildirmişdilər ki, onu Mazahir, Mezahir kimi yazaq. Hətta Fatimə adını da Fatış kimi yazmaq istəyirdilər. Biz əlbəttə ki, icazə vermədik və qarşısını aldıq. Bu tipli adların verilməsi qəti qadağan edilib” deyə Sayalı Sadıqova bildirib.
Sonrakı hadisələr barədə daha çox məlumat almaq üçün ain.az saytını izləyin.
